Gênesis 45

యోసేపు తాన్ ఎన్దో ఓర్కీ పర్తేకాద్

1 యేసేపు తనే పరివార్ ముడట్ తనెత్ ఇంకా తమ్ ఇదర్సేట ఔరడ్ "నిర్ సదర్ అన్నతనట్ సేర్" ఇసా జోరనట్ ఇడ్తేద్. యోసేపు తనే దాదకేర్ తన్ ఇడ్తేంద్ అమ్నంతి ఇంక ఎరీ తొతేర్. 2 మరి అమ్దు జొరనట్ అర్తేంద్, ఇసా ఐగుప్తు జవన్ రాజు ఎల్లతరుఙ్ అద్ విన్క వత్తిన్. 3 అప్పుడ్ యోసేపు అనే అన్నక్ తొరెల్నున్ "అన్ యోసేపు. నేడె బాంద్ ఇంకా బత్కుతి అండద్?" ఇంతేంద్. మరి అమ్నే సమక్సముత్ అమ్నె అన్నక్ తొరేల్ లంకిపాడుత్ ముతినాడ్ గొట్టి కురియెతిన్ తనేది ఇడ్డేఙ్ సాలెతెంద్. 4 అప్పుడ్ యోసేపు తనే అన్నక్ తొరేన్లు " అన్ మెరా వర్" ఇంతేంద్. ఔరు మెరా వత్తేర్ అమ్దు. "ఐగుప్తు దేసెమున సెసా నీర్ విట యోసేప్నన్ అనీ." 5 ఇంతిన్ వన్నతేంఙ్ నీర్ అన్ విటదుంఙ్ రగుఙ్ వన్నెడ్, ఇమ్మున్ నిందకన్నెమ్. తనుంఙ్ ఇసాతిరా? దెయ్యం పూరా మంది పానమున్ పొరయ్సంద్ అన్ ఇమ్మున్ పేలె పవిట్టెంద్. 6 "ఇందీ సాల్కుతన కరువు ఈ దేసమున్ అండద్, ఈ వరేకా ఐద్ సాల్కు గీన బూమి ఉర్రేకాదీ, గని పంట అర్కేకాద్ అనేద్. 7 మరి లొకముత్ ఇమే సంతతి ఇల్లుత్ అన్నఙ కలుర్, అమ్మున్ కమల్ పానం తనా బత్కెకాదున్ దెయ్యం అన్ ఇమ్మున్ పేలే పవిట్టేంద్ 8 అదుఙి అన్ ఇంతిన్ పవిటర్ నీర్ తోద్ గనీ దెయ్యం యెహోవా. అంతే ఎరేకడి అమ్దు అన్ రాజు పొల అదికర్లంఙ్, అమ్నే ఎల్లత్ పురా గొట్టికున్ మల్కాక్ ఐగుప్తు దేసం పూర పొదే అదికర్లంఙ్ కత్తెంద్. 9 ఇండి నిర్ నేడె దెయ్యం యెహోవా మెరా జలదీ వర్ సేత్న అమ్నడ్ ఇనంఙ్ ఇడ్తేంద్. ‘ఇనే కీకే యోసేపు ఇడ్డేకద్ తనేద్ ఇంతే, దెయ్యం అన్ ఐగుప్తున్ దేసం పొదే అదిపతిక్ కత్తెంద్. అన్ మెరా వర్. కోరూమ్ కన్నేర్. 10 నీవ్ గోసెను ప్రదెసంముత్ బత్కసా అనేఙ్ అన్ మెరా అన్సతీవ్. నీవ్ ఇనే సంతనమూ ఇనే మర్గే ఇనే గొర్రె, మేకె, డొర్యికే కొదా మంద ఇనే ఆస్తిపస్తులున్ గోసెనుత్ ఇడేన్ వంద్. 11 ఇంకా ఐదు సాల్కు అన్సద్, నీ ఇనే ఎల్లతరున్ గరిబులున్ వర్సేట ఇన్ ఈ జాగత్ పొరయ్సర్. ఈ కరువు’ ఇసా నేడె బాంద్ ఇడ్తేంద్. 12 ఇందొ ఇమ్మడ్ ముడేకాద్ అనీ ఇసా నీర్ అనే కొరేంఙ్ బెన్యామీను కండ్లారా ఓల్సతీర్తా! 13 ఐగుప్తుత్ అనుంఙ్ అండ తకతున్ మాన్, నీర్ ఒల్తా పురన్ నేడె బాంద్ ఇడ్తెంద్. అమ్నున్ జలదీ ఇంతీన్ తోడవర్" ఇ తనే దాదకున్ ఇడ్తేంద్. 14 అప్పుడ్ అమ్దు తనే తొరేనున్ బెన్యామీను సుమ్ముత్న కడ్లడ్ ఈర్ సప్తేంద్. 15 యోసేపు తనే అన్నక్ తొరెల్లున్ ముద్దిడిత్న, సుమ్ముత్న కడ్లడ్ ఈర్ సప్తేంద్. అదున్ వెన్కత్. అమ్నే అన్నక్ తొర్లేల్ అమ్నడ్ ముట్టేర్. 16 యోసేపు అన్నక్ తొరేల్ల వత్త కబుర్ రాజునె ఎల్లఙ్ విన్కవంతిన్. ఔరు వరేకాద్ పరన్ అమ్నే పరివరున్ వర్సతీ. 17 యోసేపు నాడ్ రాజు "ఇన్నె అన్నక్ తొరెన్లడ్ ఇనంఙ్ ఇడ్ నీర్ కలెకద్ తనెద్ ఇంత్తె, ఇమ్మె గాడ్దిక్ పొయ్ సామన్లున్ కటుత్ కనాన్ దేసుంఙ్ సెత్న, 18 ఇమ్మె బాంద్ ఇమ్మె ఎల్లతరున్ వెంట కొత్న అన్వై వారెంఙ్. ఐగప్తు దేసెముత్ కిమత్తదున్ ఇముంఙ్ సియ్సాత్. నీర్ ఈ బూమిపొయ్ అనుబవ్ సుమ్సాతిర్. 19 నీవ్ ఔరత్తి ఇనంఙ్ ఇడ్డేఙ్ పాజే. ఇమే సినపరుఙ్ సటి ఇమే మాసలుఙ్ సటి ఐగుప్తుంఙ్ తనా కాసుల్ తొడసేత్న. ఇమే బనున్ తోడవర్. 20 ఐగుప్తు దేసాంముత్ అనేకార్ విలువతా ఇమ్మే ఎర్సా, ఇసా సయేకా అస్తితా గొట్టిత్ విసర్ కన్నేర్," 21 ఇస్రాయేల్ కికే అనయ్ కత్తేర్. రాజునె గోట్టి ప్రకారం యోసేపు ఔరున్ కాసుర్లు, సేరేకదుంఙ్ తినేకా తిండి సిగత్తేంద్. 22 ఔరున్ ఒక్కొకొదుఙ్ జుఙ్ఙె సితేంద్. గని. బెన్యామీను మూది నూల్లా వెండి నానేలూ, ఐదుంతలుగా జుఙ్ఙె సితేర్. 23 అమ్దు తనే బానంతిఙ్ గినా సమాన్ పవిట్టంన్. ఐగుప్తు అనేకా సొయ్తవున్ తడయేకా పది గాడ్దికున్, సెరేకదున్ తనే బానుఙ్ సటి దానె, తిండి పదార్త, మర్మర్ తిర్గల్కు తడయేకా పది పెంటి గాడ్దిక్ పవిట్టేంద్. 24 అప్పుడ్ అమ్దు తనే అన్నక్ తొరేల్లున్ పవిట్టేంద్. ఔరు సేరెంఙ్ అమ్దు "సేరెకదున్ నీర్ వివాదాలు ఇడ్నేర్. సుమా" ఇత్తెంద్. 25 ఔరు ఐగుప్తు తనా జలదీ సేత్న కనానుదేసాముఙ్, తనే బానున్ యాకోబున్ మెరా సేద్దేద్. 26 "యోసేపు ఇంకా బత్కుతీ అండద్, ఐగుప్తు దేసం అంతీ బత్కేకార్ అండర్" ఇసా అమ్నున్ ఇడ్తేర్. యాకోబ్ ఔెరెే గొట్టి విస్వసం తోసేట ఎద్దేర్. అమ్నే మాన్ కమల్ ఎద్దిన్ 27 మరి ఔరున్ యోసేపు ఇడ్తా గొట్టి ఔరు సదర్ ఇడ్తేర్. అమ్దు తన్ తొడ సేరెకాదున్ యోసేపు పావిట్ట ఆ దండి కాసుర్ను ఓలేంఙ్ అవ్రే బాంద్ యాకోబ్నే పానం వత్ మన్ సాంతి ఎద్దిన్. 28 ఇస్రాయేల్ "ఇంకా ఎరద్. అనే కీకే యోసేపు బత్కుతీ అండద్. అన్ తిక్కేఙ్ పేలే అమ్నున్ ఓలేంఙ్ సేసాతున్."