1 Kubva kuna Phethiro, mpositoli waYesu Khirisitu.

Kubakahalugwa beNdzimu bakatihha bakapalalila mumitunhu yose yePhontiyu, yeGalathiya, yeKhapadosiya, yeAsiya, neBhithiniya, 2 bakahalugwa sezibgwa kwabo neNdzimu ibo Tate, ngeyengemadziwa ngeMeya, kuti bawhilile Yesu Khirisitu kakale banyasiwe ngemalopa awe.

Ngoni nekunyalala ngakuwande kumuli.

3 Ndzimu ngaakudziwe, ibo Tate baHe wedu Yesu Khirisitu! Ngemawhilangoni awe makulukulu takatjizwagwa butshwa mubugalibgwe gupenyu gwakabva mukumuka kubafi kwaYesu Khirisitu, 4 nemunhaka isingabole, isina hambgwa, isingahakale, yamakatjengetegwa kudzimu, 5 imwi bakadzibiligwa ngemasimba eNdzimu ngegalamoyo, kuyetila jidzo lakalindila zumbunugwa mulubaka gwebupelo.

6 Muna kose ikoku hanhani, nekene kwangwenuwali mungadziyidziwa nezwiliko zwakasiyana siyana kwelubakanyana, 7 zwiliko izwezwi zohha kudze kuti bugalimoyo gwenyu gwelebeswa gwakanaka kupinda zeezi linoti nekene lihakala lohogwa ngemoto, guthame kuti mulumbidziwe, mulemekedzewe kakale mukudziwe pakuzumbunugwa kwaYesu Khirisitu. 8 Nekene musakawumbona koga mowhundha, nekene musingawumbone ngwenuwali koga mogalamoyo muwunli kakale muhhele kuhanha kukulukulu kusingake kukalizanyisiwa ngematama, 9 ngobe mowamutjila mitjelo yebugalimoyo gwenyu, ilo jidzo lemeya dzenyu.

10 Balebesambeli bakalebesambeli nekwengoni dzakabe dzowhobe dzenyu bakahakisisa bakabhuzwisisa nekwejidzo ileli, 11 bakabhuzwisisa kuti kungabe nhu wakatini kene lubaka gupi gwakagutondekewa neMeya yaKhirisitu imubali hapa ilebesambeli nekwedziyidzika kwaKhirisitu nekudziwa kunowhotobela. 12 Kwakazumbunugwa kubali kuti abatozwihingila ibo koga banohingila imwi, muzwinhu zwatjilebgwa kumuli na ibabo bakasumikila ndebo mbuya kumuli ngeMeya Yakayengemala yakatumwa ibva kudzimu, batumwa bekudzimu bakayemula ntolo kuti bazwiwhisise zwinhu izwezwi.

13 Ndizo ke baakanyani mikumbulo yenyu ilulamile hinga, muzwidzibe, kugalamoyo kwenyu ngakupelele mungoni dzinowhohha kumuli hapa kwezumbunugwa Yesu Khirisitu. 14 Sebana bananlayo, musitjayende ngenjemulo dzamakamunadzo musanhu mukaba neluzibo, 15 koga saku iye wakamudana akayengemala, namwi bo ibani bakayengemala mukuzwibhata kose, 16 ngobe lukwalo goti, "Ibani bakayengemala, ngobe imi ndakayengemala."

17 Saku hapa mutembezela muwundhana Tate iwhoyo unotonga umwe newumwe ngemihingo iye esingahalawule, tjilani muhla lubaka gose muli mubutaya gwenyu. 18 Muzibe kuti amuzosunungugwa ngezwinhu zwinohakala zwinonga siliva kene zeezi kubva mumilenje yenyu isina mano yamakadiyiwa nabo batategulu benyu, 19 koga makasunungugwa ngemalopa anokudziwa kwazo aKhirisitu, anonga emhwizana isina nlandu kene bala. 20 Wakahalugwa kusanhu kukabambiwa hango, koga wakazumbunugwa mulubaka gwebupelo kuyetigwa imwi. 21 Muwunli muna kugalamoyo kuNdzimu, iye wakawumusa kubafi akawumpa gudzo kuyetila kuti kugalamoyo nekugalabgwe kwenyu kube kuNdzimu.

22 Saku makatjitjenesa meya dzenyu ngewhilila malebeswa kuyetila kuti mube neludo gwakwako ku amwe makamu, mudanane ngeludo gwelebeswa gunobva mumimoyo yakahalabvuka. 23 Ngobe amuzozwagwa butshwa ngembewu inopfusiwa, koga makazwagwa butshwa ngembewu isingapfusiwe, ngedama leNdzimu linogala tjoselele. 24 Ngobe lukwalo goti,

"Banhu bose banonga buhwa

negudzo labo lose longa luba lebuhwa.

Buhwa gopisiwa nehhuba, luba likowa,

25 koga dama laHe logala tjoselele."

Dama ilelo indebo mbuya yakasumikigwa kumuli.