1 Ndizo letjani lubengo gose netjebela kose, muletje butjengeli nendandala netukana kene kwayipi zila. 2 Sebana batjetjana, yemulani nkaka mbuyanana wemeya, kudze mutubule kula mudza munoswika mukutjidziwa, 3 ngobe imwi makatjilabila lulama kwaHe.

4 Ihhani kuwunli, kubgwe ilelo linotjila, lakalambiwa nebabaki, koga mbeli kweNdzimu lakahalugwa kakale lolemekedzewa, 5 semabgwe anotjila ke imwi tjekwenyu mobakiwa mukaba n'umba yemeya, kuti mube baphirisiti bakayengemala, banowhopila zwibhayilo zwemeya zwinowamutjilika kuNdzimu nentha yaYesu Khirisitu. 6 Ngobe lukwalo goti.

"Lingani, ndobiga bgwe muZiyoni,

bgwe linotambunudza mbako lakahalugwa kakale libuya,

iye unogalamoyo muwunli atowhobhakhwa nehoni."

7 Kumuli imwi munogalamoyo, bgwe ileli libuya, koga kuna ibabo basingagalemoyo,

"Bgwe ilo tjekwalo lakalambiwa nebabaki

ndilo latjiba bgwe linotambunudza mbako,"

8 kakale,

"Ibgwe linowhokunha banhu,

ihongwe inowhobaliga."

Banokunhiwa nentha yesawhilila dama, sekwabakalingiligwa kuti bakuthame.

9 Koga imwi muludzi gwakahalugwa, baphirisiti baMambo, tjaba tjakayengemala, banhu beNdzimu, kuti musumikile mihingo yakanaka ya iwhoyo wakamudana emudusa muhhalima emusa mutjedza tjitje tjinotjenamisa. 10 Makatongobe musi banhu beNdzimu koga ngwenu mabe banhu beNdzimu, makatongobe musakawhigwa ngoni koga ngwenu matjiwhigwa ngoni.

11 Badikani, ndomukumbilisisa sebezi nebataya kuti muthubukane nezwinhu zwinodiwa nembili zwinogwisana nemeya dzenyu. 12 Tjilani butjilo guna mazwibhato pakati kweBataya, kuyetila kuti hapa beleba nekwenyu beti mubatjinyi, babone mihingo yenyu yakanaka balumbidze Ndzimu muhhuba laanotikumba.

13 Muzwitebamise kubatungamili bose behango mukuyetila kuti muhanhise He, kungaba mambo, iye upehhugwi, 14 kene babhati bemitunhu, sekwabakatumwa nayiye kuti balange ibabo banotjinya nekudza ibabo banothama ndulamo. 15 Ngobe kuda kweNdzimu kuti ngethama ndulamo makafanila nyaladza zwilengwe zwisina luzibo. 16 Tjilani sebanhu bakasununguka, koga musingahingise lusununguko gwenyu mufumika zwibi, koga tjilani sebalanda beNdzimu. 17 Lemekedzani banhu bose, mude makamu, muhle Ndzimu, mulemekedze mambo.

18 Balanda, muzwitebamise nemazwibhato ose kuna bobatezi bose, musikuthame kuna bakalulama nebana moyonlefu koga, koga muzwitebamise nekuna ibabo banomutshambidzila. 19 Ngobe tjinhu tjakanaka kwazo hapa umwe nhu edzikitidza alimumagwadzo nedziyidziwa kusakafanila, ngobe egalabgwe muNdzimu. 20 Ngobe komubhatsha neni, hapa mulobegwa tjinya mukodzikitidza? Koga hapa mudziyidzigwa thama tjakalulama mukodzikitidza, ikoku kobokeka kuNdzimu. 21 Ngobe makadanigwa ikoku, ngobe Khirisitu bo wakadziyilila imwi, emusiyila tjilakidzilo, kuti mutshambe munhambo dzidze. 22 Haazotongotjinya, tjebela akuzotongobhuda munlomo uwe. 23 Wakati etukwa, haazotongobatuka bo, wakati edziyila, haazotongobahlisidzila, koga wakagalamoyo kuna iye unotonga kwakalulama. 24 Khirisitu tjekukwe wakasenga matjinyo edu mumbili uwe patjileyanyo, kudze kuti tife mumatjinyo titjile mundulamo. Ngemabanga awe makatjidziwa. 25 Ngobe maka munga mhwizi dzakalahika, koga ngwenu matjihandukila kuNlisi neNtjengeti wemeya dzenyu.