1 Ndizo saKhirisitu akadziyidzika mumbili, ibani nenkumbulo wakafanana na iwhoyo, ngobe kene yani unodziyidzika mumbili kobva kuti wakathubukana nejinyo, 2 kuyetila kuti atjile butjilo gugwe gose muno muhango kusi ngenjemulo dzembili koga ngekuda kweNdzimu. 3 Lubaka gwakapinda makamuthama tjinodiwa neBataya, mutjila nekusazwibhata, mutjila munjemulo dzinohemesa, nemukulaladza, muyeta mizano inazwinolaladzisa ihhele kusazwibhata, kakale munamata zwidzimwana. 4 Banotjenamisiwa nekuti amutjazwihanganya nabo mukuzwibhata kwabo kwakayipa, ndizo bemutuka, 5 koga banowhozwihandulila kuna iye watjilulamila tonga bapenyu nebafi. 6 Ndizo ndiko ndebo mbuya yakasumikigwa kene kubafi, nekuti nekene bakatongewa munyama sebanhu, batjile mumeya seNdzimu.

7 Bupelo gwezwinhu zose gwabepedlo, ndizo mikumbulo yenyu ngayitambunuke kakale muzwidzibe kuyetila kuti mutubule tembezela. 8 Pehhugwi kwezwinhu zose bhatililani paludo gusingapele mudane, ngobe ludo gofukidza matjinyo manjinji. 9 Yendilani mbeli muwamutjilana zwakanaka musingan'un'urike. 10 Se umwe newumwe wenyu akawamutjila tjipo, makafanila tjihingisa bhatsha bamwe, sebatjengeti babuya bengoni dzeNdzimu dzakasiyana siyana, 11 hapa kene yani elebeleka, ngaalebeleke se unolebeleka matama eNdzimu, kene yani unohinga, ngaahinge se unohinga ngesimba linobva kuNdzimu, kuyetila kuti mutjimwe netjimwe Ndzimu akudziwe muna Yesu Khirisitu. Gudzo nemasimba ndekukwe nekusingapele. Akujalo.

12 Badikani, musitjenamisiwe nezwiliko zwinohlisa zwinomuwila zwiwhomulika, sekunonga kunoyi kunatjimwe tjinhu tjisakawholobeleka tjinoyetika kumuli. 13 Koga ke hanhani saku muhanganyila mukudziyidzika kwaKhirisitu, kudze muhanhe bo kwazo hapa gudzo lile lizumbunugwa. 14 Hapa mutukwa nentha yezina laKhirisitu, makakombolegwa, ngobe Meya yegudzo, Meya yeNdzimu igele mumuli. 15 Koga kusibe ne umwe wenyu unodziyidziwa nentha yekuti umbulayi, kene imbava, kene unoyeta zwibi, kene unoda zwinginisa mundebo dzebamwe banhu, 16 koga hapa udziyidziwa nentha yekuti uNkhirisitu, usibe nehoni, koga kudza Ndzimu kuti wakasenga zina laKhirisitu.

17 Ngobe lubaka gwatjiswika kuti tongewa kutangile kuna ibabo ben'umba yeNdzimu, ngono hapa kuli kuti kotangila kutili, bupelo gwayibabo basingawhilile ndebo mbuya yeNdzimu gowhoba tjini? 18 Selukwalo guti,

"Hapa kulema kunhu wakalulama kuti atjidziwe,

kowhoba tjini ke ngono kuntjinyi usingahle Ndzimu?"

19 Ndizo ke, ibabo banodziyidziwa kuyendidzana nekuda kweNdzimu ngabathame mihingo yakalulama base meya dzabo kuMbumbi iye unogalikabgwe.