1 Kubva kuna Phawuli mpositoli waKhirisitu Yesu ngelaya kweNdzimu Ntjidzi wedu naKhirisitu Yesu, unobe ali iye kugalabgwe kwedu.

2 Kuna Thimothi nkololo wangu wemalebeswa mubugalimoyo.

Ngoni, nemawhilangoni, nekunyalala kunobva kuNdzimu Tate bedu naKhirisitu Yesu He wedu ngakube nawe.

3 Sekwandakakukulumbidza ndiyenda kuMakhedoniya, gala ikweno kuEfesu kuyetila kuti ulaye bamwe banhu kuti basitjadiye zwidiyo zwemanyepwa,* 4 nekuti basibhatikane nekwengano nangelongoloso dzisingapele dzabobatategulu dzinohhisa kakabadzana, pana kuti dziyendisilembeli n'hingo weNdzimu webugalimoyo; 5 tjinangwa tjenlayo iwhoyu kube neludo gunobva mumoyo wakatjena, nemuhana mbuyanana, nebugalimoyo gwelebeswa. 6 Bamwe bakathewuka muzwinhu izwezwi, bekangina mudada. 7 Banoyemula kuti babe badiyi benlayo, koga abatoziba tjabanoleba, nekwabanokowhomesedza abatokuwhisisa.

8 Ngwenu toziba kuti nlayo umbuya hapa nhu ewuhingisa nezila yakatambunuka. 9 Toziba ikoku, kuti nlayo awuzobaakanyigwa bakalulama koga wakayetigwa basina nlayo nebasingawhilile, nebasingahle Ndzimu nebatjinyi, nebasakayengemala nebanahambgwa, wakayetigwa banobulaya botatayi nebanobulaya bomayi babo, nebabulayi bebanhu, 10 wakayetigwa basingazwibhate, betjilume banowalilana nhobo*, banotapa banhu bebatengesa, banoleba manyepwa, banopa busupi gwemanyepwa, kene kumwe zwako kunoleyana nezwidiyo zwakatambunuka. 11 Zwidiyo izwezwi zoyendidzana nendebo mbuya inagudzo leNdzimu wakakombolegwa, iyo yandakagaliwabgwe nekwayo.

12 Ndoboka Khirisitu Yesu He wedu wakandipa masimba ngobe wakandibona kuti ndogalikabgwe akandihala kuti ndibe mun'hingo uwe, 13 nekene ndakatongoleba zwakayipa nekweNdzimu, ndiwundziyidza ndiwuntuka. Ndakawhigwa ngoni ngobe ndakandikuthama mukusaziba ndilihhele sagalamoyo, 14 nengoni dzaHe wedu dzakaba njinji tjose pehhugwi kwangu, kose nebugalimoyo neludo kumuna Khirisitu Yesu. 15 Matama iyawa anogalikabgwe kakale anofanila wamutjigwa, anoti Khirisitu Yesu wakahha muhango kuti ewhotjidza batjinyi. Imi ndimi ntjinyi kupinda bose, 16 koga nentha yayikoku imi ndakawhigwa ngoni, kuti ndizo mundili imi ntjinyi nkulu Khirisitu Yesu alakidze moyonlefu uwe wakapelela kuli tjilakidzilo kuna ibabo banowhogalamoyo muwunli kuti bawane butjilo gusingapele. 17 Kakale ngwenu kuna Mambo welubaka gose, usingafe, usingabon'we, iye Ndzimu woga, ngaalemekedzewe kakale akudziwe nekusingapele. Akujalo.

18 Thimothi nkololo wangu, ndokupa nlayo iwhoyu kuyendidzana neleba kwebulebesambeli kwakatongolebgwa nekuko, hingisa matama iyawo kudze kuti ugwe ngwa mbuya. 19 Mukuthama ikoku wakafanila bhatilila mubugalimoyo nehana mbuyanana. Bamwe banhu bakapaladza bugalimoyo gwabo nentha yesawhilila hana dzabo. 20 Pakati kwabo kuna Hhemenasi naAlekizanda, bandakapa Satane kudze badiyike kuti basituke Ndzimu.