1 Meya inoleba patjena kuti mumahhuba ebupelo bamwe banhu banowhothewuka pabugalimoyo, banowhowhilila meya dzemanyepwa, bakatobela zwidiyo zwemeyambi. 2 Zwidiyo zwakajali zo andamisiwa nebatjengeli bemanyepwa bana hana dzakafa dzinonga dzakapisiwa netshipi inopisa, 3 banodzibisa banhu lobola, bediya kuti zwimwe zodliwa azwitodliwa zwinoba zwakabumbiwa neNdzimu kuti zwiwamutjigwe nekuboka kwayibabo banogalamoyo kakale beziba malebeswa. 4 Ngobe kose kwakabumbiwa neNdzimu kwakanaka, akuna tjinofanila lambiwa hapa kuli kuti kowamutjigwa muboka, 5 ngobe kobe kwayengemadziwa nedama leNdzimu nangentembezelo.

6 Hapa ungadiya milayo iyeyi mbeli kwebagalimoyo, nowhoban'hingi mbuya waKhirisitu Yesu, wakalelegwa mumatama ebugalimoyo, nange muzwidiyo zwibuya zwawunotobela. 7 Ugalile kule nengano dzebulengwe nezwilebo zwinasahla Ndzimu. Gala uzwidiya hla Ndzimu. 8 Ngobe zwisimisa mbili kuna gumwe lubhatsho, koga hla Ndzimu kobhatsha muzwinhu zose, ngobe kuna tjigadzabgwe tjebutjilo gwangwenuwali nemubutjilo gunohha. 9 Ndebo iyeyi imalebeswa kakale yakafanila wamutjigwa nemaboko mabili. 10 Ndizo ndiko tihinga zwakabangalala kakale tigwisa nemasimba ose, ngobe galabgwe kwedu takakusa kuNdzimu unotjila, unoba Ntjidzi webanhu bose, bukulu ibabo banogalamoyo.

11 Laya kakale udiye zwinhu izwezwi. 12 Kusibe nenhu unokulingila pasi nentha yebutjetjana gugo, koga iba tjilakidzilo kubagalimoyo, palebeleka kuko, nezila yawunothama nayo zwinhu, muludo, mubugalimoyo, nemukuyengemala. 13 Kuswika ndatjihha, uzwipile balila banhu whalo, nelaya kose nediya. 14 Usihayile hanya tjipo tjawunatjo, tjawakawamutjidziwa nebulebesambeli, nelubaka lubahhe gwebawhola pagwakakubiga maboko. 15 Hinga mihingo iyeyi, uyihinge nekuzwipila, kuyetila kuti bose babone bhudilila kuko. 16 Uzwitjengete kakale ulondolodze tjawunodiya, ubhatilile muzwinhu izwezwi, ngobe ngethama ujalo nowhozwitjidza iwe nayibabo banokuwha.