1 Usitjemele nlumetate whola pakuli nebuhongola, koga uwunkulumbidze sekwawunokulumbidza tate babo. Ubhate balume batjetjana pakuli sekunoyi banun'una babo, 2 betjikadzi bawhola ubabhate sabomeyabo, nebetjikadzi batjetjana sehazwadzi dzidzo ube nemoyo mbuyanana kwazo.

3 Lemekedza tjilikadzi dzitjilikadzi kwemalebeswa. 4 Koga hapa kuli kuti tjilikadzi ina bana kene bana bebana, bakafanila kuti batange zwidiya hhadzisa nlandu webugalimoyo wezwipila kuna ben'ha wabo, kakale balinge bazwadzi babo saku bazwadzi babo bakabalela bo, ngobe ikoku kowamutjilika mbeli kweNdzimu. 5 Tjilikadzi yelebeswa, yatjisala isitjina kene yani, galabgwe kwayo kose yatjikusa kuNdzimu kakale inoyendilambeli ilimuntembezelo ikumbila kuNdzimu siku nesikati. 6 Koga tjilikadzi inotjilila nzipo yakafa nenguba itjila. 7 Ubalaye sayikoku kuyetila kuti bawanike bakatjena. 8 Hapa kuna nhu usingatjengete hama dzidze, bukulu ben'ha uwe kobva kuti kene bugalimoyo wakagulaha kakale umbi kupinda usingagalemoyo. 9 Tjilikadzi inamakole ezwagwa apasi kwemakole makumi matanhatu isikwagwe mulukwalo gwebhatsho, kakale tjilikadzi inokwagwa yakafanila ba yakaba mfumakadzi kunlume un'ompela, 10 kakale yakafanila lebgwa zwakanaka nekwayo inazwiyeto zwibuya selela bana, nebhata bezi zwakanaka, nengudza makumbo ebayengemali, nebhatsha bamumamanikano nezwipila yeta zose zwiyeto zwibuya.

11 Koga ke ulambe kwala pasi tjilikadzi njhetjana, ngobe hapa pisa kwelopa kwekulila zwipila kuna Khirisitu dzoyemula lobogwa, 12 nayikoku kodzithama dziwanike nlandu wethubula tjituno tjadzakathama kutanga. 13 Kuhhe kwayikoko dzozwidiya busimbe, dzihwa dzipoteleka nemizi, adzitoba simbe koga, pehhugwi kwayikoku dzotendeleka dziyeta bun'wa, neda leba ndebo dzebamwe dzileba zwinhu zwadzisakafanila leba. 14 Ndizo ke ndobona kuli hine kuti tjilikadzi njhetjana dzilobogwe dzibe nebana dzitjengete mizi yadzo, dzisipe tjita nkoba wetileba zwakayipa. 15 Ngobe dzimwe tjilikadzi dzakatjithewuka dzikatobela Satane. 16 Hapa kuna nghalimoyo wetjikadzi* una hama dzitjilikadzi, ngaadzibhatshe dzisibe ntolo wegubungano, kudze gubungano litubule bhatsha tjilikadzi kwelebeswa.

17 Bawhola banotungamila gubungano nezila yakatambunuka ngabalemekedzewe kwakapamhiwa, bukulu ibabo banobhata n'hingo wesumikila newediya, 18 ngobe lukwalo goti, "Usisunge nlomo wen'ombe inohokola zwidlo,"✝ kakale koyi, "N'hingi wakafanila lipiwa mbhayilo uwe."✝ 19 Usibvume bon'wa nlandu kwewhola kuhhe kwekuti kuna busupi gunobva kubanhu babili kene batatu. 20 Koga ibabo banolambila mumatjinyo ubatjemele mbeli kwebanhu, kuyetila kuti bamwe bose bahle.

21 Ndokulaya mbeli kweNdzimu naKhirisitu Yesu nebatumwa beNdzimu bakahalugwa kuti utjengete milayo iyeyi, usingahalawule kakale usingamile nhu. 22 Usitjimbidze biga nhu maboko, kene wanikwa uhanganyila mumatjinyo ebamwe banhu, uzwitjengete ulimbuyanana.

23 Tjiletja n'wa vula yoga, hingisa wayini homanana kuyetila ntumbu uwo saku ugala ugwala.

24 Matjinyo ebamwe banhu apatjena anobatangila noswika kubugalo gwetongewa, koga matjinyo ebamwe anowhobhuda patjena mumahhuba anohha. 25 Nayiyeyo zwayo zila zwiyeto zwakanaka zoboneka patjena, nekene zwisipatjena azwingasumbikike tjatjose.