1 Siku ya mwanduso ya mwezi wa sita muna umwaka wekaidi wa utawala wa mfalume Dalio wa Uajemi, Mndewa Mulungu kamwing'ha usenga mulotezi Hagai yawagalile Zelubabeli mwana wa Shealitieli yeli mtawala wa Yuda na mkulu wa nhambiko digogogo Yoshua mwana wa Yehosadaki. 2 Mndewa Mulungu Yeli na Udahi kamulongela Hagai, "Wanhu wolonga lusita lwa kuizenga kaidi kaye yangu lung'hali." 3 Mbuli ya Mndewa Mulungu iwezila kufosela mulotezi Hagai, ilonga, 4 "Vino luno lusita lwa mweye kukala muna zikaye zenu zinogile kuno kaye yangu isigala matongo?" 5 Lelo Mndewa Mulungu Yeli na Udahi kolonga, "Muzigese vinogile sang'hano zenu. 6 Mohanda mbeyu nyingi, mbali mogobola chidogo. Moja mbali hamwiguta. Mong'wa divai mbali hamkolela. Moyawala mawalo mbali mung'hali mowona mbeho. Mopata mayombe mbali yolawa fana yekigwa muna umfuko udegeke."

7 Mndewa Mulungu Yeli na Udahi kolonga, "Muzigese vinogile sang'hano zenu." 8 Mndewa Mulungu kolonga, "Hiteni kuna imilima mgale mibiki na muizenge kaidi kaye yangu, muladi niideng'helele na nitogozigwe. 9 Mulolela kupata ndiya nyingi, mbali mupata chidogo. Vimuigalile ukaye niihembelusa. Habali? Kwaviya kaye yangu isigala matongo kuno chila munhu kosang'hanila kaye yake. 10 Lekamana ulanga uleka kugala mvula na isi ileka koteza ndiya. 11 Nigala ng'hangu muna iisi, nigala mnyalila muna imigunda ya ndiya, nigala mnyalila muna imigunda ya mizabibu na muna imigunda ya mizaituni na chila mbiki, nigala ng'hangu kwa wanhu na wanyama. Mwizasang'hana sang'hano mbali hamwizapata chinhu."

12 Baho Zelubabeli mwana wa Shealitieli na mkulu wa nhambiko digogogo Yoshua mwana wa Yehosadaki, hamwe na wanhu wose wabwelile kuuhami watenda fana viyawalagilize Mndewa Mulungu, Mulungu wawo, iviya fana viwalongeligwe na mulotezi Hagai ija mulotezi yatumigwe na Mndewa Mulungu, Mulungu wawo. Wanhu wamdumba Mndewa Mulungu. 13 Maabaho Hagai mulotezi wa Mndewa Mulungu kaweng'ha wanhu usenga kulawa kwa Mndewa Mulungu. Mndewa Mulungu kalonga, "Niye nabahano hamwe na mweye."

14 Mndewa Mulungu kamguma moyo Zelubabeli mwana wa Shealitieli yakalile mtawala wa isi ya Yuda hamwe na mkulu wa nhambiko digogogo Yoshua mwana wa Yehosadaki na wanhu wose wabwelile kulawa kuuhami. Wandusa kuzenga kaidi kaye ya Mndewa Mulungu, Mulungu wawo, Yeli na Udahi, 15 muna isiku ya malongo maidi na nne ya mwezi wesita muna umwaka wekaidi wa utawala wa mfalume Dalio.