1 Mwizagaya, mweye wanhu wa bululu da Yelusalemu,

mumemile mbuli zihile na mwambula mwiko,

mumema ubamanyi.

2 Hamuhulika kuzumigwa na hamutogola kutegeleza.

Hamumuhuwila Mndewa Mulungu,

hamumkwenhukila Mulungu wenu.

3 Walangulizi wenu walinga fana simba wotongoloma,

wasemi wenu walinga fana mbwizi weli na nzala ya ichigulogulo,

hawaleka chochose mbaka imitondo.

4 Walotezi wenu hawafaya na wavwizi,

wakulu wa nhambiko wenu wavitenda vinhu velile vambule mwiko,

kwa kutenda mbuli zilemigwa na malagilizo.

5 Mbali Mndewa Mulungu yokala muna dibululu ijo kana haki,

kohumiza voilondeka.

Chila siku imitondo kogong'onda nhaguso yake,

chila vikukunguzuka koifikiza.

Mbali wanhu wotenda mbuli zihile wabule chinyala.

6 Mndewa Mulungu kolonga, "Nizinanga zisi zimwenga,

mhongono zawo zisigala matongo.

Niyabananga makulugumbi yawo,

muladi wanhu sekewafose umo.

Habule munhu yoyose yondayasigale,

habule munhu yokala umo.

7 Nilonga, ‘Kweli wanhu wa bululu dino wezanidumba na wezatogola kuzumigwa,

muladi sekenizinange kaye zawo na sekeniwataguse.

Mbali wanhu wake wakala wang'hali wolonda kutenda mbuli zihile fana ziwatendile.’ "

8 Mndewa Mulungu kolonga, "Nigozele niye,

kwaviya siku iyo nizakwiza kulava usindila.

Nilamula kuziduganya zisi zose na falume,

muladi niwataguse kwa ludoko lwangu lukulu.

Zisi zose zizatimbuligwa kwa moto wa wivu wangu.

9 "Baho nizawabwelezela wanhu wa zisi zimwenga ulonzi unogile,

muladi wadahe kunitanga niye Mndewa Mulungu,

na wose wanitambikile hamwe.

10 Kulawa kuumwambu wa nyanda za Kushi,

wanhu wangu wowonitambikila,

wanhu wangu waimwagile wezanigalila nhosa.

11 "Siku iyo hamwizagumigwa chinyala

kwa uhasanyi wose womunitendele,

kwaviya nizawasegeza wanhu wose woigoda na kuitenda wakulu.

Baho hamwizaigoda kaidi kuna umulima wangu welile.

12 "Nizamulekelani wanhu wahole na wanyendanyenda,

wanhu wondawanihuwile niye Mndewa Mulungu niwakombole.

13 Waisilaili wondawasigale hawezatenda mbuli zihile,

hawezalonga uvwizi,

hawezawavwizila wanhu wamwenga.

Wezapata ndiya na kugona.

Iviya habule munhu yondayawadumbize."

14 Mweye wanhu wa Sayuni,

imbeni kwa dizi kulu,

mweye wanhu wa Isilaili, toweni ng'henze.

Mweye wanhu wa Yelusalemu, sekeleleni na mudeng'helele kwa mizoyo yenu yose.

15 Mndewa Mulungu kamsegezelani nhaguso yenu,

kawawinga wehi wenu.

Mndewa Mulungu mfalume wa Isilaili kahamwe na mweye.

Hamwizadumba kaidi kunangigwa.

16 Siku iyo wanhu wa bululu da Yelusalemu wezalongeligwa,

"Sekemudumbe mweye wanhu wa Sayuni

na makono yenu sekeyabobe.

17 Mndewa Mulungu, Mulungu wenu, kahamwe na mweye.

Yeye galu kezamtendani muhume.

Kwa ichimu chenu, kezadeng'helela ng'hani.

Kwaviya komulondani, mwizakala kwa tindiwalo.

Kwa ichimu chenu, kezadeng'helela kwa kwimba kwa dizi kulu.

18 Nizawaduganya wanhu wowona usungu kwaviya hawadaha kutenda dugila,

iviya hawezawona chinyala kaidi.

19 Lusita ulo nizawatagusa wanhu wose wombamanyani.

Nizawakombola mbetembete na kuwaduganya wanhu wose waimwagile.

Nizawatenda watogozigwe na kuhishimigwa chila isi iwagumigwe chinyala."

20 Mndewa Mulungu kolonga,

"Lusita ulo nizamduganyani na kumbwelezani ukaye.

Nizamtendani mumanyike na mutogozigwe na wanhu wose muna izisi zose.

Nizambwelezelani mateka wenu kuno molola."