1 Mbuli ya Mndewa Mulungu imwizila Sefania mwana wa Kushi, mzukulu wa Gedalia mwana wa Amalia mwana wa Hezekia muna zisiku za Yosia mwana wa Amoni mfalume wa Yuda.

2 Mndewa Mulungu kolonga,

"Nizavinanga vinhu vose muladi sekeviwoneke muna iisi.

3 Nizawananga wanhu na wanyama,

nizawananga ndege na somba.

Wanhu wose wotenda mbuli zihile nizawakoma,

nizawananga wanhu muna izisi zose.

Niye Mndewa Mulungu nolonga ivo.

4 Nizaitagusa isi ya Yuda,

na wanhu wose wokala muna dibululu da Yelusalemu.

Nizananga chila chinhu chosang'haniligwa kumtambikila mulungu Baali muna iisi ino,

habule yondayamanye mazina ya wakulu wa nhambiko wake.

5 Nizawananga wose wotambika kuna ichisuwili na wotambikila zuwa na mwezi na nhondo za kuulanga.

Nizawananga wose wonitambikila na kuilaha kwa zina jangu Mndewa Mulungu,

mbali iviya woilaha kwa zina da mulungu yotangigwa Malikamu.

6 Niye Mndewa Mulungu nizawananga waja woleka kunitambikila,

wanhu wose walekile kunizahila na kuniuza mbuli."

7 Munyamale haulongozi ha Mndewa Mulungu,

kwaviya siku ya Mndewa Mulungu ya kutagusa yahabehi.

Mndewa Mulungu kasasala nhambiko ya wanhu wake,

kawasafya wanhu woyawagoneke.

8 Mndewa Mulungu kolonga,

"Muna isiku ija ya nhambiko yangu,

nizawatagusa walangulizi wa wanhu wawo,

na wana wa mfalume,

hamwe na wose wosondelela vihendo va chigeni.

9 Siku iyo nizawatagusa wanhu wose wozumha chizingiti cha kaye fana wanhu wotambikila milungu imwenga,

womemeza magayo na uvwizi muna ikaye ya milungu yawo."

10 Mndewa Mulungu kolonga,

"Siku iyo uko Yelusalemu kwizahulikika ndilo kulawa muna ulwivi lutangigwa Lwivi lwa Somba,

giyogiyo kulawa muna ichibumbila cha habehi,

dizi kulu kulawa muna imilima.

11 Lileni mweye mukala habehi na gulilo,

kwaviya wachuuzi wose wanangigwa,

wachuuzi wa vinhu wakomigwa.

12 Lusita ulo nizamulika chitasa kudipekula bululu da Yelusalemu.

Nizawatagusa wanhu wailegehe,

waja wokala kwa kutenda uhasanyi bila kudumba hebu kuwona chinyala.

Nizawatagusa wogesa muna imizoyo yawo,

‘Mndewa Mulungu hezatenda chinhu chinogile hebu chihile.’

13 Utajili wawo wizahokigwa,

na kaye zawo zizakuwa matongo,

wezaizengela kaye, mbali hawezakala umo.

Wezahanda mizabibu, mbali hawezakung'wa divai yake.

14 Siku ng'hulu ya Mndewa Mulungu ya kutagusa yahabehi

na yokwiza himahima,

siku iyo kwizahulika dizi da usungu.

Iviya magalu wolila kwa usungu.

15 Siku iyo izakuwa ya ludoko,

siku ya uzidilwa na usungu,

siku ya unanzi na uchiwa,

siku ya ziza na lugano,

siku ya mawingu na ziza totolo.

16 Siku iyo izakuwa ya mhalati na madizi ya ng'hondo,

kwa ichimu cha mabululu yeli na ng'huta na mhongono.

17 "Nizawagalila wanhu uzidilwa na wezagenda fana viya wanhu hawalola,

kwaviya wanihasanya niye Mndewa Mulungu.

Damu yawo izakwitiligwa fana matimbwisi na nyama zawo zizalagala fana mavi.

18 Hela zawo na zahabu zawo hazidaha kuwakombola muna isiku iyo ya ludoko ya Mndewa Mulungu.

Mbali isi yose izanangigwa kwa moto wa wivu wake,

kezagala uhelelo wa wose wokala muna iisi kwa kusinhukiza."