1 Muiduganye, muiduganye hamwe mweye wanhu wa iisi mwilibule chinyala.

2 Muiduganye ing'hali siku ipangigwe hainafika,

siku ija yohembelusigwa fana makang'ha,

lung'hali halunawezila ludoko lukulu lwa Mndewa Mulungu,

ing'hali hainafika siku ya ludoko lwa Mndewa Mulungu.

3 Mzahileni Mndewa Mulungu mweye mose muli wanyendanyenda,

mweye muzindilila malagilizo yake.

Zahileni kutenda mbuli zinogile na muinyendenyende,

yodahika mwizakwikigwa goya muna isiku ya ludoko lwa Mndewa Mulungu.

4 Wanhu wa bululu da Gaza wezasegela,

bululu da Ashikeloni dizasigala matongo,

wakaya wa isi ya Ashidodi wezawingigwa imisi,

na wanhu wa bululu da Ekiloni wezawingigwa.

5 Mwizagaya mweye mukala mumgwazo wa bahali,

wanhu wokala isi ya Wakelesi.

Mndewa Mulungu kalamula ivo na kezamtagusani.

Komulongelani mweye womukala Kanaani muna iisi ya Wafilisiti,

"Nizamnangani mose na habule munhu yoyose yondayasigale."

6 Isi ili mumgwazo wa bahali izakuwa hanhu ha kudimila,

izakuwa na vizewe va wadimi na vikwama va ng'hondolo.

7 Isi iyo izakuwa ya wanhu wasigale muna ikaye ya Yuda.

Umo wezadima wanyama wawo.

Ichigulogulo wezagona muna zikaye za bululu da Ashikeloni,

kwaviya Mndewa Mulungu kezawezila na kuwabweleza fana viwakalile.

8 Niyahulika maligo yowaligile Wamoabu

na kwehula kwa wana wa Amoni,

wawaliga wanhu wangu,

na waitogoza kuiteka isi ya wanhu wangu.

9 Mndewa Mulungu Yeli na Udahi, Mulungu wa Isilaili kolonga, "Noilaha fana vonikala kuwa kweli isi ya Moabu izakuwa fana Sodoma,

na isi ya Amoni izakuwa fana Gomola.

Zisi izo zizakuwa fana mgunda wa makombo ya munyu na masavu,

zizakuwa hazinoga ndiya siku zose.

Wanhu wangu wondawasigale wezazihoka,

wanhu wa isi yangu wasigale wezahazi zisi izo."

10 Mbuli izo zose zizawapata kwa ichimu cha magoda yawo,

kwaviya wawaliga na wawazeha wanhu wa Mndewa Mulungu Yeli na Udahi.

11 Mndewa Mulungu kezawadumbiza,

vondayainange milungu yose ya isi.

Wanhu wa zisi zose wezamtambikila,

chila munhu muna iisi yake.

12 Mndewa Mulungu kolonga, "Iviya mweye wanhu wa Kushi,

nizamkomani na zele jangu."

13 Mulungu kezagolosa mkono wake ubanzi wa kasikazi,

muladi yawanange Waashuli,

kezaditenda bululu da Ninawi diwe matongo.

Iviya dizakuwa fana bwilingu.

14 Mabumbila ya wanyama wa kufugigwa wezagona umo,

hamwe na chila modeli ya wanyama.

Bundi matuwa na bundi ng'hengeu wezakala muna imhanda yake.

Madizi yawo yezahulikika muna yamazonzo.

Muna ivizingiti mwizakuwa timbwisi,

mhanda zizasigala ziidumwe.

15 Dino niijo bululu dili na deng'ho,

dodikala vinogile.

Dodilonga, "Niye nabaha, habule dimwenga!"

Diwa matongo na hanhu ha kugona wanyama wa kumbago.

Wose wofosa mumgwazo wake wojehula na wodizeha kwa kutingisa yamatwi.