1 Mulotezi Habakuki kompula Mndewa Mulungu, kokwimba kwa kuiyalala.

2 Weye Mndewa Mulungu nihulika nhogolwa zako,

nodumba mbuli ziutendile.

Uchitendele mbuli ziutendile umwaka,

uchitende chizimanye.

Uhapata ludoko, chokulamba uchiwonele ubazi.

3 Mulungu keza kulawa isi ya Temani,

Mulungu yelile keza kulawa mulima Palani.

Ukulu wake ugubika ulanga,

isi imema nhogolwa zake.

4 Bung'hulo jake dilinga fana da zuwa,

milambi ya bung'hulo ilawa muna yamakono yake,

niuko koyafisile nguvu zake.

5 Utamu wa tauni umulongolela,

mahulo yamsondelela.

6 Kema na zisi zose zigudemeka,

kalola zisi, nazo zigudemeka.

Milima ya umwaka yotulika,

vilima va umwaka viidulika,

nzila zake zikala fana za umwaka.

7 Niwona wanhu wa Kushani wogaya,

wanhu wa Midiani wagudemeka.

8 Vino weye Mndewa Mulungu viukwelile falasi wako,

na matololi yako ya kubululigwa na falasi muladi uhume

kuiwonela ludoko mizanda?

Vino kuyawonela ludoko mazi ya bahali?

9 Kusasala upinde wako,

kwika misale yako muna uluzabi,

kutula isi kwa mizanda.

10 Milima ikuwona igudemeka na mazi yakuluma.

Bahali ibuma na inula mawimbi yake.

11 Mwezi na zuwa vihupika,

viviwonile misale ya lumwemwe wako yofosa himahima,

viviwonile mgoha wako viumelemeta.

12 Kufosa muna iisi kwa ludoko,

kuwabojoga wanhu wa zisi zimwenga kwa ng'hasiliki yako.

13 Kulawa kuhita kuwakombola wanhu wako,

kumkombola ija youmsagule kwa sang'hano yelile.

Kumuhonda mulangulizi wa wanhu wotenda mbuli zihile,

kuwananga wanhu womsondelela.

14 Kuhoma matwi ya watowang'hondo wake kwa migoha yake mwenyewo,

wezile fana vulavumbi muladi wachipwililise,

kuno wodeng'helela kuwamela ngayengaye kwa kuwasepa.

15 Kugenda uchanyha ya bahali kwa falasi wako,

na kuyatibula yamazi.

16 Nihulika mbuli iyo na munda wangu wogudemeka,

mulomo wangu wogudemeka kwa kudumba.

Utamu wingila muna imivuha yangu na magulu yangu yogudemeka.

Mbali nizakala hupi na kugozela siku ya magayo,

yondaiwafikile waja wochitowa.

17 Mnhini hawizakwalika,

mizabibu haizakwima,

mzaituni wizagaya bule,

migunda haigala ndiya,

muna ivikwama hamwizakuwa na ng'hondolo,

hebu muna yamabumba hamwizakuwa na ng'ombe.

18 Mbali nizagendelela kumdeng'helela Mndewa Mulungu,

nizamtowela ng'henze Mulungu mkombola wangu.

19 Mulungu, Mndewa Mulungu niiyo yoning'ha nguvu,

koigangamiza migulu yangu fana ya mhala,

konidahiza kufosa uchanyha ya milima.

Kwa mulangulizi wa nyila. Kwa via va nyila va usingija.