1 Malaguso ya Mulungu yoyawonile mulotezi Habakuki.

2 Vino weye Mndewa Mulungu, nizakupula unitaze mbaka zuwaki?

Vino weye hulonda kuhulika?

Nolila kwaviya nowona usede chila hanhu,

mbali hulonda kuchikombola!

3 Habali konitenda niwone mbuli zihile na mbuli za usede?

Ubananzi na usede va kuulongozi wangu.

Ndwagi na kuibishila volawilila.

4 Malagilizo yabule nguvu,

wanhu hawahumiza voilondeka.

Wanhu wotenda mbuli zihile wowazunguluka wanhu wotenda mbuli zinogile,

ivo nhaguso yoilavigwa hailavigwa voilondeka bule.

5 Mndewa Mulungu kalonga, "Zilole zisi zimwenga,

lola na wazanywe ng'hani!

Kwaviya niye notenda mbuli muna zisiku za ugima wako,

na hwizatogola hata uhalongiligwa.

6 Kwaviya nizawagala Wababeli,

weli wasede na weli na himahima kufosa wose,

wawo wofosa muna izisi zose,

muladi wasole iisi haili yawo.

7 Wanhu wawo wodumbigwa ng'hani,

wotenda viwolonda wenyewo.

Wawo wozindilila malagilizo yawo muhala.

8 Falasi wawo wahuha kufosa duma,

wakali kufosa mbwizi weli na nzala.

Watowang'hondo wakwelafalasi wolawa kutali na wokimbila himahima.

Woguluka himahima fana viya masumula viyoiyoha yaje.

9 Wose wokwiza kutenda ndwagi.

Mabumbila yawo ya usede yogenda kuulongozi,

Woduganya mateka wengi fana msanga.

10 Wowazeha wafalume

na wowehula watawala.

Woyazeha mabululu yose yeli na mhongono,

wotenda misugulu ya ulongo

muladi wakwele na kuyateka mabululu yayo.

11 Maabaho wofosa fana vulavumbi na wogenda kuulongozi,

wotenda ubananzi,

kwaviya mulungu wawo niiyo nguvu yawo."

12 Vino weye siyo Mndewa Mulungu kwandusila umwaka?

Weye Mndewa Mulungu niiyo Mulungu wangu welile,

hachizadanganika.

Weye Mndewa Mulungu, kuwasagula Wababeli wachihumize!

Weye luwe lwetu lwa kuwagangamiza muladi wachitaguse!

13 Weye kwela ng'hani, hudaha kulola ubananzi,

hudaha kufunyila umoyo kulola mbuli zihile.

Lelo habali kowawona wanhu wotenda mbuli zihile na huwatenda chochose?

Habali wanhu wotenda mbuli zihile wowakomeleza wanhu wotenda mbuli zinogile kufosa wawo na konyamala?

14 Kuwatenda wanhu kuwa fana somba muna ibahali,

fana viya vilumbe wotambala welibule mulangulizi.

15 Wehi wokwiza kuwalowa wanhu kwa ndwano zawo,

wowabululila kunze kwa nyavu zawo,

wowaduganya wose muna imigono yawo,

maabaho wodeng'helela na wonogelwa.

16 Ivo wozilavila nhambiko nyavu zawo,

na kusomela ubani migono yawo,

kwaviya kwa nyavu zawo wokala kwa utajili,

kuno woja ndiya inogile.

17 Vino hawezaleka kukwega upinde wawo?

Vino wezagendelela kunamata wanhu,

na kuwananga wanhu wa zisi zimwenga bila kuwawonela ubazi?