1 Dizagaya bululu dimemile wanhu wokoma wayawo,

dimemile uvwizi na ubavi,

hadileka kuhoka vinhu.

2 Tegeleza viya balati vidilanha,

tegeleza sindo za maguludumu,

sindo za falasi wokimbila ng'hani,

na mbumo wa matololi ya kubululigwa na falasi.

3 Mkwelafalasi yahakwela,

zele na migoha vomelemeta,

wanhu wakomigwe wengi ng'hani,

wanhu woikwala muna imitufi haipeteka.

4 Weye Ninawi kuwa fana malaya,

weye mndele wa uhawi kuwakwega wanhu,

kuwatenda wanhu wa zisi nyingi kuwa watumwa kwa umalaya wako,

na kuwakwega wanhu wa zisi nyingi kwa uhawi wako.

5 Niye Mndewa Mulungu Nili na Udahi nolonga,

"Nizaitowa na weye,

nizakuda walo jako mbaka kuna iditwi,

muladi wanhu wa zisi zimwenga wawone lukuli lwako,

falume zimwenga ziwone chinyala chako.

6 Nizakwasila unyolodo,

nizakwehula na kukuguma chinyala.

7 Wanhu wose wondawakuwone wezakukimbila kuno wolonga,

‘Bululu da Ninawi dinangigwa,

yelihi yondayadililile?

Yelihi yondayadigume moyo?’ "

8 Vino weye bululu da Ninawi kofaya ng'hani kufosa bululu da Sebesi,

dizengigwe mumgwazo wa lwanda lwa Naili?

Bululu da Sebesi dizingigwa na mazi,

bahali ikala mhongono yake,

mazi yakala ng'huta yake.

9 Isi ya Kushi na Misili zoditaza bululu da Sebesi,

iviya ditazigwa na isi ya Puti na Libia.

10 Mbali bululu da Sebesi disoligwa mateka,

wanhu wake wagalilgwa kuuhami.

Wanage wahondigwa mumgwazo wa kulugumbi.

Wanhu wake wohishimika wogoligwa kwa kuwatowela mhiya,

na walangulizi wake wose wazingilizigwa minyololo.

11 Mweye wanhu wa bululu da Ninawi iviya mwizakoligwa,

mwizamkimbila mwihi na mwizageza kuifisa.

12 Weye Ninawi, mhongono zako zose zilinga fana mibiki ya nhini ili na nhini zivile,

ihatingisika, nhini zolagalilila muna umulomo wa munhu yoja.

13 Lola watowang'hondo wako,

wodumba fana wanaake.

Nyivi za bululu jako zivuguligwa kwa wehi wako,

Moto utimbula mhalalingwe zake.

14 Deha mazi uisasale kuzingigwa na ng'hondo.

Gangamiza mhongono zako.

Sasala ulongo kwa kubojoga,

Sasala tanuli da kusomela matafali.

15 Uko moto wizakutimbula,

na zele dizakukanha.

Dizakukomeleza fana nzige viwoja.

Mongezeke fana nzige,

Mongezeke fana mbalangulu!

16 Wachuuzi wako wawa wengi kufosa nhondo za kuulanga,

mbali walinga fana nzige woleka isi ilibule chinhu,

sambi wasegela fana nzige viwoguluka.

17 Vinyandama wako walinga fana mbalangulu,

wakulu wako wa watowang'hondo walinga fana bumbila da nzige,

lusita lwa chihuhwe wokala muna zing'huta.

Zuwa dihalawa woguluka,

mbali habule yovimanya kowohita.

18 Weye mfalume wa Ashulu,

wadimi wako wogona,

vinyandama wako wokukila.

Wanhu wako wapwililika kuna imilima,

habule munhu wa kuwaduganya.

19 Habule chinhu cha kuhonya vilonda vako,

vilonda vako vokutenda udanganike.

Wanhu wohulika mbuli zako wosekelela.

Vino yelihi haumanyile usede wako ulibule uhelelo?