1 Mweye wanhu wa Ninawi,

mwihi wenu kokwiza kumgwilani,

Ivo kalizeni mhongono zenu na nzila zenu.

Isasaleni kuitowa,

duganyeni watowang'hondo.

2 Mndewa Mulungu kowabwelezela welesi wa Yakobo nguvu zawo,

iviya kezawabwelezela Waisilaili hishima yawo.

Kwaviya wanhu wa Yuda na Isilaili wahokigwa na wehi wawo,

na mibiki yawo ibenigwa yamatambi.

3 Ngao za wehi wawo zitendigwa ndung'hu,

watowang'hondo wavala mawalo madung'hu ng'hani,

matololi yawo ya kubululigwa na falasi yomelemeta fana milambi ya moto.

Migoha ya mibiki ya mielezi yomelemeta.

4 Matololi ya kubululigwa na falasi yogala sindo mwiinzila,

yohita himahima muna dikulugumbi,

yowoneka fana viya miwenge,

yogenda himahima fana lumwemwe.

5 Wowatanga wakulu wa watowang'hondo wawo,

viwohita woikwala.

Wohita kuing'huta himahima,

woiyoha muladi wahite kuwakimilila.

6 Nyivi za lamba zivuguligwa,

kaye ya chifalume igwa.

7 Nyivi za bululu zivuguligwa zose,

wanhu wasoligwa mateka.

Wake zawo wotenda matanga na wolila fana mhugi,

na woitowa muna zimhambaga kwa usungu.

8 Bululu da Ninawi dilinga fana lamba ditulike na mazi yake yolawa himahima,

wanhu wake wokimbila chaka.

Dizi dotanga, "Imeni! Imeni!"

Mbali habule hata imwe yobwela hachisogo.

9 Soleni hela zitekigwe,

soleni zahabu itekigwe.

Ngama yake yabule uhelelo.

Kuna vinhu vingi va hela nyingi.

10 Bululu da Ninawi dinangigwa na disigala matongo muhala,

wanhu wake wafa moyo,

nguvu ziwamala na meso yawo yaweweseka kwa kudumba.

11 Lelo dakulihi tuka da simba,

dowoifisa wanasimba?

Vino hanhu baho ha simba hakala vilihi?

Hanhu howokala wanasimba habule munhu yodaha kuwasinhusa?

12 Simba lume diwasasalila wanage nyama ifaya.

Diwagwilila mazike ya simba ukala wake.

Dimemeza muna dituwa jake wanyama woyawagwilile.

13 Niye Mndewa Mulungu Nili na Udahi nizaitowa na mweye.

Matololi yenu ya kubululigwa na falasi nizayatimbula kwa moto,

na zele dizawakanha wanasimba wenu.

Sizamulekelani musake muna iisi.

Madizi ya wasenga wenu hayezahulikika kaidi.