1 Mbuli ya Mulungu iyalongile kusonhela wanhu wa bululu da Ninawi. Chitabu cha mbuli ziyalagusigwe Nahumu mkaya wa Elikoshi.

2 Mulungu kana wivu na kolihiliza chisasi.

Mndewa Mulungu kolihiliza chisasi na kana ludoko,

Mndewa Mulungu kowalihilizila chisasi wehi wake.

Kowawonela ludoko wehi wake.

3 Mndewa Mulungu hapata ludoko himahima,

mbali kana nguvu.

Hezawalekelela wabananzi!

Mndewa Mulungu yahamala kufosa, beho na vulavumbi volawilila,

mawingu yalinga fana matimbwisi yotimuligwa na magulu yake.

4 Koikalikila bahali na koinyaza.

Kozinyaza nyanda zose.

Iviya kozinyaza nyanda za Bashani na Kalimeli,

na maluwa ya Lebanoni yonyala.

5 Milima yogudemeka haulongozi wake,

na vilima vogudemeka.

Zisi zose zomgudemekela,

zisi zose na vinhu vose viliumo vogudemeka.

6 Habule yodaha kwima haulongozi wa ludoko lwa Mndewa Mulungu.

Habule yodaha kufunyila umoyo ludoko lwake lukulu.

Yeye kolwitila ludoko lwake lukwaka fana moto,

na kotula miluwe.

7 Mndewa Mulungu kanoga,

yeye niiyo mhongono ya kukimbilila lusita lwa uzidilwa.

Yeye kowakaliza wanhu wose wokimbilila kumwake.

8 Mbali kezawananga wanhu wa Ninawi kwa gombo,

kowasondelela wehi wake na kuwawinga mbaka kuna diziza.

9 Vino mweye momulungila choni Mndewa Mulungu?

Yeye kezakimilila malungilo ya waja womulema,

muladi sekewamuleme kaidi.

10 Wezatimbuligwa fana chibago cha miwa,

na kukoligwa kwa upele wawo.

Wezanangigwa fana mabuwa yanyalile.

11 Weye bululu da Ninawi, kumwako kulawa munhu yailungile kutenda mbuli zihile kusonhela Mndewa Mulungu,

yoyolava magesa yehile.

12 Mbali Mndewa Mulungu kolonga, "Ingawa Waashulu wengi ng'hani na wana nguvu,

wezagwisigwa na kunangigwa.

Ingawa nimgazani mweye wanhu wangu,

sizamgazani kaidi.

13 Sambi nikanha nila zenu na nizakanha nzabi zenu."

14 Mndewa Mulungu kalamula vino kusonhela Ninawi,

"Hwizapata wana wa kuhazi zina jako.

Nyang'hiti zako za kutambikila zisongoligwe na nyang'hiti za kutambikila zitendigwe na chuma cha kulumbula,

nizazibena umo muna zikaye za milungu yako.

Nizakusasalila leme jako,

kwaviya weye hufaya chochose."

15 Lola uchanyha kuna umulima,

kuna magulu ya munhu yogala mbuli zinogile,

munhu yogong'onda mbuli ya tindiwalo.

Wanhu wa Yuda tendeni madugila yenu,

iviya mufikize vilaho venu.

Wanhu wotenda mbuli zihile hawezamtowani kaidi,

mbali wezanangigwa ng'hani.