1 Nizagaya! Kwaviya nilinga fana munhu yokwaha matunda lusita lwa kugobola,

mbali habule nhini za mwanduso zinilonda.

Lusita lwa kwaha zabibu,

habule hata chipambo chimwe cha kuja.

2 Habule munhu mwaminika yasigale muna iisi,

habule munhu yoyose yotenda goya.

Chila munhu kolonda kukoma,

chila munhu komsepa miyage muladi yamgwile.

3 Wose magalu wa kutenda mbuli zihile,

walangulizi na wasemi wolonda lushwa.

Wakulu wolonga mbuli zihile ziwogesa muna imizoyo yawo,

na woilunga kupata chinhu chiwolonda kufosela wasemi.

4 Munhu yotenda mbuli zinogile viweli kalinga fana mbigili.

Munhu goya kumwawo kodumbiza kufosa mbago ili na miwa.

Siku igozigwe ya nhaguso yawo ifika.

Sambi wosafagila ng'hani.

5 Sekeumuhuwile miyago,

na sekeumulolele mbwiyako,

sekeumulongele muke wako mbuli zili muumoyo wako.

6 Kwaviya wana wa chilume wowehula tati zawo,

na wandele woibishila na mami zawo,

iviya wakoi wa chike wowalema wakoi zawo,

wehi wa munhu wolawa muna ikaye yake mwenyewo.

7 Mbali niye nomulolela Mndewa Mulungu,

nomgozela Mulungu yeli mulopozi wangu,

Mulungu wangu kezanihulika.

8 Sekeudeng'helele mahulo yangu weye mwihi wangu.

Nihagwa, nizakwinuka kaidi,

nihawa muna diziza, Mndewa Mulungu niijo bung'hulo jangu.

9 Kwaviya nimuhasanya Mndewa Mulungu,

nizafunyila umoyo ludoko lwake,

mbaka vondayanigombele muna imbuli yangu,

na kuning'ha haki yangu,

Kezanigala kunze kuna dibung'hulo,

nizauwona ulopozi wake.

10 Maabaho mwihi wangu kezawona mbuli iyo,

na kezawona chinyala,

kwaviya kanilongela, "Kakulihi Mndewa Mulungu, Mulungu wako?"

Nizamuwona viyogwa hasi,

kezabojogigwa fana nhope muna inzila.

11 Siku yokwiza, ng'huta za mabululu yenu zizazengigwa kaidi.

Siku iyo mhaka za isi yenu zizagalamusigwa.

12 Siku iyo ndugu zenu wezambwelelani,

kulawa isi ya Ashulu na mabululu ya isi ya Misili,

hata kulawa isi ya Misili mbaka lwanda lwa Efulate,

kulawa bahali imwe kuhita bahali imwenga,

kulawa mulima umwe kuhita mulima umwenga.

13 Isi yose izakuwa matongo kwa ichimu cha wakaya wake,

kwa ichimu cha mbuli zihile ziwatendile.

14 Weye Mndewa Mulungu, uwadime wanhu wako kwa balati jako,

udidime bumbila jako,

dodikala diidumwe kuna imbago,

kuna iisi ili na ulongo unogile.

Uwadime fana viutendile umwaka,

kuna umgunda wa kudimila uli Bashani na Gileadi.

15 Fana siku ija viuchilavile muna iisi ya Misili,

uchilaguse kaidi mauzauza yako.

16 Wanhu wa zisi zimwenga vondawahulike mbuli izo wezawona chinyala,

ingawa wana nguvu.

Wezakwika makono yawo muna imilomo yawo,

na magutwi yawo yezatulika.

17 Wezakuja msanga fana zoka,

fana vilumbe vitambala hasi.

Wezalawa muna yamatuka yawo kuno wogudemeka.

Wezamuhindukila Mndewa Mulungu, Mulungu wetu kwa kugudemeka,

na wezamdumba.

18 Weye Mndewa Mulungu, habule yalingile fana weye,

kolekelela uhasanyi wa wanhu wako wasigale wagima,

na hulola ubananzi wawo.

Ludoko lwako halugendelela siku zose,

mbali kodeng'helela ng'hani kuwalonda wanhu kwa kufunya umoyo.

19 Weye Mndewa Mulungu, kwizachiwonela ubazi kaidi,

kwizaubojoga uhasanyi wetu,

kwizasegeza uhasanyi wetu,

kwizawasa muna ivilindi va bahali.

20 Kwizachilagusa waminika wako na viuchilonda kwa kufunya umoyo,

fana viuwalaganile wasaho zetu Bulahimu na Yakobo.