1 Wezagaya wanhu wogesa mbuli zihile na woilunga kusang'hana wihi muna yamakomwa yawo,

imitondo wotenda mbuli izo, kwaviya wodaha kutenda ivo.

2 Womelela mate migunda na kuisola,

wahalonda kaye wohoka.

Wowagaza wanhu na kaye zawo,

wowabamanya wanhu uhazi wawo.

3 Ivo Mndewa Mulungu kolonga,

"Noilunga kumgalilani magayo,

hamudaha kugwaza hata chidogo,

lwizakuwa lusita lwihile kumwenu,

na hamwizagenda kwa magoda.

4 Siku iyo wanhu wezamtungilani nyila za kumzehani,

wezalila kuno wolonga,

‘Cheye chinangigwa ng'hani.

Mndewa Mulungu kaisola isi yetu.

Kaisegeza muna yamakono yetu.

Migunda yetu kawagolela wachitekile.’ "

5 Ivo hamwizagoliligwa hanhu hohose ha isi mwa wanhu wa Mndewa Mulungu.

6 Walotezi wawo wolonga, "Sekemulotele.

Sekemulotele mbuli izo.

Cheye hachizapata magayo."

7 Mweye welesi wa Yakobo, vino mbuli zino ziuzigwe?

Vino Mndewa Mulungu kaleka kufunya umoyo?

Vino nikutendela mbuli zilingile ivo?

Mbuli zangu zowafaya wanhu wotenda vinhu vinogile.

8 Mbali Mndewa Mulungu komulongelani,

"Wanhu wangu wawa fana wehi wangu.

Mowahoka mbwiya zenu mawalo yawo,

mowahoka wanhu wogenda bila kudumba,

na hawagesa ng'hondo.

9 Mowawinga wake za wanhu wangu muna zikaye zawo zinogile,

mowasegezela wana wawo uhazi uweng'higwe na Mulungu siku zose.

10 Inukeni musegele,

hano habule hanhu ha kuhumula,

kwaviya hambula mwiko,

hanangigwa ng'hani.

11 One munhu kolawilila na kogong'onda mbuli za uvwizi muhala,

na kulonga, ‘Nowalotela mweye divai nyingi na upele mwingi.’

Munhu iyo kezakuwa mulotezi wa wanhu wano.

12 Mbali kweli nizamkunzagizani mweye welesi wa Yakobo,

nizamkunzagizani mweye Waisilaili musigale,

niwagale hamwe fana ng'hondolo muna ichikwama.

Fana viya bumbila kulu da ng'hondolo muna umgunda wa mayani,

mweye mwizakuwa bumbila da wanhu wengi.

13 Yondayatule nzila kezawalongolela,

nawo wezalubena lwivi lukulu lwa bululu na kulawa kunze,

wezafosa na kulawa kunze.

Mfalume wawo kezawalongolela,

Mndewa Mulungu mwenyewo kezawalongolela."