1 Lusita lokwiza,

mulima wa kaye ya Mndewa Mulungu wizakuwa mkulu kufosa milima yose.

Wizakwinuligwa uchanyha ya vilima vose.

Wanhu wengi wezaimemeza umo.

2 Wanhu wengi wezakwiza na kulonga,

"Chiteni kuna umulima wa Mndewa Mulungu,

kuna ikaye ya Mulungu wa Yakobo.

Kezachifunza ndagilizi zake,

muladi chizizindilile."

Kwaviya mafundizo yezalawa Sayuni,

mbuli ya Mndewa Mulungu izalawa Yelusalemu.

3 Mndewa Mulungu kezahumiza hagati ya wanhu wengi,

kezawazuma wanhu wa zisi zili kutali zili na nguvu,

Wawo wezanola mazele yawo yagaluke kuwa magembe,

na migoha yawo igaluke kuwa sengo.

Wanhu hawezakwinula mazele kuwatenda vihile wanhu wa isi imwenga,

hebu kusasala ng'hondo kaidi.

4 Chila munhu kezakala kwa tindiwalo,

hasi ya mibiki ya nhini na mizabibu,

bila kudumbizigwa na munhu yoyose.

Mndewa Mulungu Yeli na Udahi kalonga mbuli izo.

5 Wanhu wamwenga wosondelela milungu yawo,

mbali cheye chomsondelela Mndewa Mulungu, Mulungu wetu siku zose.

6 Mndewa Mulungu kolonga, "Siku iyo

nizawakunzagiza mbetembete,

na nizawakunzagiza wanhu wagaligwe kuuhami,

wanhu niwagazile."

7 Nizawatenda mbetembete wasigale wagima,

nizawatenda wanhu wagaligwe kuuhami wawe isi ili na nguvu.

Mndewa Mulungu kezawatawala kuna umulima Sayuni,

kwandusila lusita luja na siku zose.

8 Weye Yelusalemu,

uli mulima wa Sayuni,

fana Mulungu kowakaliza wanhu wake,

fana mdimi viyodima ng'hondolo wake,

kwizakuwa bululu dinogile ng'hani fana umwaka.

Yelusalemu kwizakuwa bululu kulu da mfalume kaidi.

9 Lelo habali molila kwa dizi kulu?

Vino mwabule mfalume?

Vino wabala wenu wose wadanganika?

Mogutilila fana muke yolumwa usungu.

10 Mweye wanhu wa Sayuni,

lileni na mubimbilike fana muke yolumwa usungu,

kwaviya mwizasegela muna dibululu dino na mwizahita kukala kuchuwala.

Mwizahita kukala Babeli,

mbali uko, niye Mndewa Mulungu, nizamulopolani muna yamakono ya wehi wenu.

11 Wanhu wa zisi nyingi woiting'hana muladi wamtoweni.

Woigoda kuno wolonga, "Lekeni bululu da Yelusalemu jambule mwiko,

muladi chiyawone matongo ya Sayuni."

12 Mbali hawayamanyile magesa ya Mndewa Mulungu,

na hawadimanyile lungilo jake,

yeye kezawakunzagiza fana makinza,

hana ihanhu ha kubigila.

13 Mndewa Mulungu kolonga,

"Mweye wanhu wa Sayuni, inukeni muwatowe wehi wenu.

Nizamwing'hani nguvu fana za ng'ombe lume.

Nizamwing'hani mahembe ya chuma na mapaga ya shaba,

muladi muwahonde wanhu wa zisi nyingi.

Vinhu vondamuvihoke mwizaning'ha niye.

Mwizaning'ha vinhu vawo niye Mndewa Mulungu, Mulungu wa zisi zose."