1 Tegelezeni Mndewa Mulungu viyolonga.

Inuka ukaiyalale kuna imilima,

na vilima vihulike mbuli ziulonga.

2 Mweye milima, tegelezeni Mndewa Mulungu viyowalongeleza wanhu wake,

tegelezeni, mweye vandusilo vigangamale va isi,

Mndewa Mulungu kana mbuli ya kuwalonga wanhu wake.

Yeye kezawalonga Waisilaili.

3 Mndewa Mulungu kolonga,

"Mweye wanhu wangu, niye nimtendani choni?

Nimulegezani na choni?

Nilongeleni.

4 Nimulavani muna iisi ya Misili,

nimkombolani kulawa kuutumwa,

nimwing'hani Musa na Haluni na Miliamu wamulangulizeni.

5 Mweye wanhu wangu,

kumbukeni viya Balaki mfalume wa Moabu viyailungile,

iviya Balaamu mwana wa Beoli viyamwidike,

mukumbuke mbuli zilawilile muna inzila kulawa Shitimu kuhita Giligali,

muladi muzimanye sang'hano zangu zinogile."

6 Vino nimgalile choni Mndewa Mulungu,

muladi nimtambikile Mndewa Mulungu yeli uchanyha ng'hani?

Vino nimgalile nhambiko za kutimbula,

hebu nimgalile dang'ang'a da mwaka umwe?

7 Vino Mndewa Mulungu kezanogelwa,

one nihalava maelufu ya mabebelu ya ng'hondolo,

hebu nyanda elufu longo za mavuta?

Vino nimulavile mwanangu wa udele kwa ichimu cha uhasanyi wangu?

8 Mweye wanhu, Mulungu kamulagusani mbuli zimulondeka kutenda,

Mndewa Mulungu kolonga mutende vinhu vinogile,

muhumize voilondeka,

mulonde kuwa na ubazi,

na mukale kwa kuinyendanyenda kwa Mulungu wenu.

9 Mndewa Mulungu kowatanga wakaya wa bululu,

vinoga ng'hani kumtambikila yeye.

Muihishimu fimbo na ija yaisagule.

10 Sizafunyila umoyo vinhu vihile,

vovimemezigwa muna zikaye za wanhu wotenda mbuli zihile,

vinhu vimupatile kwa ningo za uvwizi

vinhu viya vitibusa.

11 Vino nodaha kulonga kuwa wabule ubananzi wanhu wosang'hanila ningo za uvwizi

na mabwe ya kulingila yeli hayafaya?

12 Matajili wenu wadugi,

wanhu wenu wavwizi,

na chila mbuli iwolonga ya uvwizi.

13 Ivo niye nyandusa kumgwisani hasi,

na kumnangani kwa ichimu cha uhasanyi wenu.

14 Mwizakuja mbali hamwizakwiguta,

nzala izaiyoha muna izinda zenu.

Mwizakwika ngama mbali haikika,

muheka chinhu nizachilava kwa ng'hondo.

15 Mwizahanda mbeyu, mbali hamwizagobola.

Mwizakama zaituni, mbali hamwizasang'hanila mavuta yayo.

Mwizakama zabibu, mbali hamwizakung'wa divai.

16 Mweye mohiga mbuli zihile za mfalume Omili

na mbuli zihile za welesi wa Ahabu,

na motenda viwolonda wawo.

Ivo nizamnangani,

na wanhu wenu wezakwehuligwa.

Wanhu wa zisi zose wezamzehani.