1 Mndewa Mulungu kalonga na mulotezi Mika mkaya wa Moleshesi muna zisiku za utawala wa Yosamu na utawala wa Ahazi na utawala wa Hezekia viwakalile wafalume wa Yuda. Mika kawona mbuli zino zose kusonhela Samalia na Yelusalemu.

2 Tegelezeni, mweye wanhu wose,

tegelezeni, mweye zisi zose na vinhu vose vili umo.

Mndewa Mulungu kokwiza kumulongani,

kulawa kuna ikaye yake yelile.

3 Mndewa Mulungu kokwiza kulawa hanhu hake hoyokala,

kokwiza na kobojoga uchanyha ya milima.

4 Milima izalumbuzuka fana uhula habehi na moto,

Mabawe yezatulika fana viya uhula habehi na moto,

fana mazi viyokilima muna ingema.

5 Mbuli zino zose zizalawilila kwa ichimu cha mbuli zihile ziwatendile welesi wa Yakobo,

na kwa ichimu cha uhasanyi wa wanhu wa Isilaili.

Vino uhasanyi wa welesi wa Yakobo wakulihi?

Wauko Samalia.

Vino hanhu howotambikila wanhu wa Yuda hakulihi?

Hauko Yelusalemu.

6 Ivo Mndewa Mulungu kolonga, "Nizaditenda bululu da Samalia kuwa matongo.

Migunda ya mizabibu izakuwa uko.

Mabwe youzengile nizayasa kudikolongo

na nizavihimbula vandusilo vake.

7 Nizazibena nyang'hiti zose za milungu ya uvwizi ya Samalia.

Vinhu vose vilavigwe vizatimbuligwa na moto,

nizazinanga nyang'hiti zake zose za milungu.

Kwaviya kapata vinhu ivo fana viyolihigwa malaya,

vovisang'haniligwa kuliha yombe da malaya imwenga."

8 Kwa ichimu chino nizalila na kuomboleza na nizagenda ukengele na nizagenda bila vilatu,

nizabwaka fana mbwizi,

nizaiyalala na kulila fana bundi.

9 Kwaviya utamu wa wanhu wa Samalia haudaha kuhona,

iviya uwapata wanhu wa isi ya Yuda,

ulufikila lwivi lwa Yelusalemu,

hanhu howokala wanhu wangu.

10 Sekemugong'onde mbuli ino uko Gasi,

na sekemulile masozi,

mubimbilike muna ditimbwisi uko Besi Leafila.

11 Mweye mukala Shafili,

muhite ukengele na muwe na chinyala.

Wakaya wa Saanani sekemulawe kunze ya bululu jawo.

Wanhu wa Besi Ezeli wolila,

hawezamtazani.

12 Wakaya wa Malosi wogozela ng'hani kutazigwa,

mbali ndilo yokwiza kulawa kwa Mndewa Mulungu na ifika muna dibululu da Yelusalemu.

13 Mweye wakaya wa Lakishi,

muwafungile falasi matololi.

Muwakwega Waisilaili kutenda uhasanyi,

uhasanyi wa Waisilaili uwoneka kumwenu.

14 Ivo molondeka kuwalaga wakaya wa Moleshesi Gasi.

Lelo Bululu da Akizibu hadizawataza wafalume wa Isilaili kwa chinhu chochose.

15 Mweye wakaya wa Malesha,

Mulungu kezamgalilani mwihi yondayamsoleni.

Watawala wakulu wa Isilaili wezakimbilila kuifisa mudituka da Adulamu.

16 Mweye wanhu wa Yuda, weguleni matwi yenu,

muwalilile wanenu womuwalonda.

Weguleni mabwenzi muladi muwoneke fana vilele,

kwaviya wanenu wahita kutali na mweye kuuhami.