1 Mbali Yona hanogelwe na mbuli iyo na kapata ludoko ng'hani. 2 Ivo kampula Mndewa Mulungu, kalonga, "Weye Mndewa Mulungu, nivimanya kwandusila umwaka kuwa hwizadinanga bululu da Ninawi. Lekamana nidileka bululu jangu na kuhita Talishishi. Weye Mulungu kuhola na kuna ubazi. Hupata ludoko himahima. Kolagusa ulondo mkulu wa kufunya umoyo na hulonda kuwananga wanhu. 3 Lelo, Mndewa Mulungu nokulamba unikome kwaviya muhavu nidanganike kufosa kuwa mgima."

4 Mndewa Mulungu kamwidika, "Vino kogesa vinoga viuwona ludoko?"

5 Yona kalawa muna dibululu, kahita kukala ubanzi wa ulawilo wa zuwa wa bululu. Uko kazenga chizewe na kakala hana imbeho muladi yawone muna dibululu mwizalawilila choni. 6 Maabaho Mndewa Mulungu katenda lutanga lutambale lumpatile Yona mbeho, muladi lumuhunguzile Yona magayo. Yona kaludeng'helela ng'hani lutanga luja. 7 Mbali igolo yake imitondo, Mulungu kalagiliza sondo yaludafune lutanga ulo, nalo lunyala. 8 Zuwa vijalike, Mulungu kasasala beho da ulawilo wa zuwa dili na vuke ng'hani. Zuwa dimwakila Yona muna iditwi mbaka kakala habehi kusinduka. Kalonda kudanganika na kalonga, "Muhavu nidanganike kufosa kuwa mgima."

9 Mulungu kamuuza Yona, "Vino kogesa vinoga kuwona ludoko kwa mbuli ija iulawilile lutanga luja?" Yona kedika, "Ona vinoga! Nina ludoko mbaka nowona muhavu nidanganike."

10 Mndewa Mulungu kamulongela Yona, "Weye kuluwonela ubazi lutanga hulugaiye lotile. Lutanga ulwo lukangala kwa ichilo chimwe na kubanangigwa igolo yake. 11 Mbali bululu da Ninawi dina wanhu wengi hawadaha kuvimanya kwika goya mbuli zinogile na mbuli zihile. Iviya waumo ng'ombe wengi. Vino silondeke kudiwonela ubazi bululu ijo?"