1 Yona viyakalile muna umunda wa somba kampula Mndewa Mulungu, Mulungu wake, 2 kalonga,

"Vinikalile muna uuzidilwa wangu,

nikupula weye Mndewa Mulungu na kunidika.

Vinikalile kuzimu nikupula weye Mndewa Mulungu,

na kunihulika dizi jangu.

3 Kwaviya kunyasa hana yamazi mengi,

hanhu hagidimile muna ibahali,

mawimbi ya mazi yanizunguluka banzi zose,

na mazi mengi yafosa uchanyha yangu.

4 Niye nilonga, ‘Kuniwinga kutali sekeuniwone,

mbali nizaiwona kaidi kaye yako yelile.’

5 Mazi yanimemela mbaka yafika muna isingo,

mawimbi yanizunguluka,

na mayani ya bahali yanigubika ditwi jangu.

6 Nihulumuka mbaka hasi ya milima ili muna ibahali,

uko mhalalingwe zihindigwa siku zose,

mbali weye Mndewa Mulungu kunikombola kulawa umo muna dikombo.

Weye Mndewa Mulungu, Mulungu wangu.

7 Vinikalile habehi kudanganika,

nikukumbuka weye Mndewa Mulungu,

na mbuli zinipulile zikufikila,

hana ikaye yako yelile.

8 Wanhu wotambikila nyang'hiti za milungu zili hazifaya,

wamuleka Mndewa Mulungu.

9 Mbali niye nizakulavila nhambiko ya kukwing'ha hewela,

Nizavifikiza vilaho vangu.

Mndewa Mulungu niiyo yokombola."

10 Baho Mndewa Mulungu kamulongela somba ija yamdeke Yona,

nayo kamdeka muna iisi.