1 Mbuli ya Mndewa Mulungu imwizila Yona mwana wa Amitai, ilonga, 2 "Segela uhite kuna dibululu da Ninawi dili kulu ng'hani. Uko ukawagong'ondele nhaguso wanhu wake, kwaviya Mndewa Mulungu kauwona wihi wawo!"

3 Mbali Yona kalema, kakimbilila Talishishi muladi sekeyatende viyalagilizigwe na Mndewa Mulungu. Kahita Yafa na kawona meli yohita Talishishi. Ivo kaliha nauli na kakwela meli iyo. Kahita hamwe nayo Talishishi muladi yambange Mndewa Mulungu.

4 Mbali Mndewa Mulungu katuma beho kulu muna ibahali, meli isung'higwa mbaka ilonda kubeneka. 5 Baho wasang'hani wa meli wadumba ng'hani. Ivo wose wailamba milungu yawo. Wasa mbahasha zawo zose muna ibahali muladi kuhunguza nzamo muna imeli.

Mbali Yona kakala kagona muna imeli. 6 Mwendeshaji meli kamuhitila Yona na kamuuza, "Habali kogona? Lamuka umpule Mulungu wako. Yodahika kezachiwonela ubazi sekechidanganike."

7 Maabaho wasang'hani waitogololela, "Chitowe mhiya muladi chivimanye habali mbuli ino ichipata?" Ivo watowa mhiya na imulagalila Yona.

8 Ivo wamuuza, "Weye kutenda choni mbaka chipatigwa na mbuli ino? Weye sang'hano yako ilihi? Weye kulawa kulihi? Kulawa isi yaki? Weye munhu wa kabila jaki?"

9 Nayo kawedika, "Niye Muebulaniya na nomtambikila Mndewa Mulungu, Mulungu wa kuulanga, yalumbile bahali na isi." 10 Yona kakala kowalongela kuwa kakala kombanga Mndewa Mulungu. Wanhu wawo viwahulike mbuli izo wadumba, wamulongela Yona, "Habali kutenda ivo?"

11 Maabaho wamulongela, "Cheye chikutende choni muladi bahali ihupike?" Kwaviya bahali ikala yokongezeka kutibuka. 12 Yona kawedika, "Nisoleni munyase muna ibahali, maabaho bahali izahupika. Novimanya kuwa niye niicho ichimu cha mweye kupatigwa na mbuli ino."

13 Wasang'hani waiyoha kutowa ng'hafi muladi wadahe kubwela kuna iisi, mbali wapotigwa kwaviya bahali iiyoha kutibuka. 14 Ivo wampula Mndewa Mulungu, walonga, "Sekeuchinange kwaviya chomkoma munhu ino, iviya sekeuchitaguse kwa kumkoma munhu yelibule ubananzi. Weye Mndewa Mulungu kutenda viulonda." 15 Ivo wamsola Yona na wamwasa muna ibahali. Lusita ulo bahali ihupika. 16 Wanhu wawo wamdumba Mndewa Mulungu ng'hani na wandusa kulava nhambiko na kumulahila.

17 Ivo Mndewa Mulungu kasasala somba mkulu muna ibahali muladi yammele Yona. Yona kakala muna umunda wa somba siku nhatu, imisi na ichilo.