1 Zino niizo mbuli ziyalagusigwe Obadia.

Mbuli ziyalongile Mndewa Mulungu kusonhela isi ya Edomu.

Chihokela usenga kulawa kwa Mndewa Mulungu,

msenga katumigwa kwa wanhu wa zisi zimwenga yalonge, "Inukeni, chihite chikaitowe na isi ya Edomu."

2 Mndewa Mulungu kailongela isi ya Edomu,

"Nizamtendani muwe mbugilambugila muna izisi zimwenga,

mwizazehigwa ng'hani.

3 Udugi wa mizoyo yenu umvwizilani.

Kwaviya mabululu yenu makulu yana mhongono za mabwe makulu ng'hani na madala,

na ukazi wenu kuna imilima,

mweye moilongela wenyewo,

‘Vino yelihi yodaha kuchihulumusa?’ "

4 Mndewa Mulungu kolonga, "One muhaguluka uchanyha fana masumula,

na kuzenga visanza venu baho hana zinhondo,

niye nizamuhulumusani.

5 One wabavi waheza kumwenu ichilo,

wobawa chinhu chiwolonda muhala.

Wanhu wokwaha zabibu, wowasigazila ngayengaye.

Mbali mweye mwizanangigwa ng'hani.

6 Mweye welesi wa Esau vinhu venu vihokigwa.

Ngama zenu zose zifisigwe zitoligwa na zisoligwa.

7 Wose woilumba na mweye wezamuwingani mbaka kuna zimhaka.

Mbwiya zenu wezamvwizilani na kumuhumani.

Waja woja gate hamwe na mweye, wezamtegelani mtego,

mbali hamudaha kuumanya."

8 Mndewa Mulungu kolonga,

"Siku iyo nizawananga wanhu wovimanya weli muna iisi ya Edomu.

Nizawananga wabala weli kuna ivilima va Esau.

9 Weye bululu da Temani, magalu wako wezadumba,

na chila munhu kezagwisigwa hasi kuna umulima wa Esau na kukomigwa.

10 Kwa ichimu cha mbuli zihile zimuwatendele ndugu zenu welesi wa Yakobo,

mwizagumigwa chinyala na mwizanangigwa siku zose.

11 Mwima kutali molola wageni viwasolile utajili wa Yelusalemu,

na wanhu wa zisi zimwenga viwengile muna zinyivi zake.

Waigolela vinhu va Yelusalemu kwa kutowa mhiya,

na mweye mukala fana wawo.

12 Sigambemuwadununze ndugu zenu muna isiku ya uzidilwa wawo.

Iviya mweye sigambemudeng'helele lusita wanhu wa Yuda viwanangigwe,

na sigambemuigode ng'hani muna isiku ya magayo yawo.

13 Sigambemwingile muna dibululu da wanhu wangu muna isiku ya uzidilwa wawo.

Iviya sigambemuwazehe muna isiku ya magayo yawo,

na sigambemuwahoke vinhu vawo muna isiku ya kunangigwa kwawo.

14 Sigambemwime muna zinzila mhanda na kuwakoma Waisilaili wakalile wokimbila.

Hebu sigambemuwagwile waja wakimbile viwakalile wogazigwa.

15 "Siku ya Mndewa Mulungu ya kutagusa yahabehi kwa zisi zose.

Fana vimuwatendele wamwenga niivo vondamutendeligwe.

Mwizalihigwa kwa sang'hano zimutendile.

16 Fana viya vimung'wile nhungo ya nhaguso yangu kuna umulima wangu welile,

niivo zisi zose vondazigendelele kung'wa.

Iviya wezahupika fana viya hawawile baho.

17 Mbali kuna umulima wa Sayuni kwizakuwa na wanhu wondawakomboligwe,

iviya mulima Sayuni wizasafyigwa.

Welesi wa Yakobo wezabwela na kuisola isi yawo ihokogwe.

18 Welesi wa Yakobo wizakuwa fana moto

na welesi wa Yosefu wizakuwa milambi ya moto.

Iviya welesi wa Esau wizakuwa fana mabuwa yanyalile,

wezakwaka na kutakamila.

Hezasigala munhu yoyose muna uwelesi wa Esau."

Mndewa Mulungu kolonga ivo.

19 Waja wokala uko Negebu wezausola mulima wa Esau

na wanhu wa isi ya mabawe wezaisola isi ya Wafilisiti

na kukala muna imigunda ya Efulaimu na Samalia.

Wanhu wa kabila da Benyamini wezaisola isi ya Gileadi.

20 Bumbila da Waisilaili wakalile kuuhami,

wezabwela na kukala mwiisi ya Kanaani mbaka Salepita.

Wanhu wa Yelusalemu wakalile kuuhami uko Sefaladi,

wezayasola mabululu ya Negebu.

21 Wakombolaji wezakwela uchanyha ya Mulima Sayuni

muladi kuutawala mulima wa Esau.

Maabaho Mndewa Mulungu kezakuwa mfalume na kutawala.