1 Nimuwona Mndewa Mulungu kema mumgwazo wa lupango, kanilongela,

"Zitowe mhanda za kaye ya Mulungu mbaka vandusilo vake vitingisike.

Ubene mhanda ziwagwile wanhu muna yamatwi.

Waja wondawasigale nizawakoma kwa zele,

habule hata imwe yondayasulupuke.

Habule hata imwe yondayakimbile.

2 Wahaihimbila kombo da kuhita kuzimu,

nizawagwila kwa mkono wangu.

One wahakwela kuulanga,

nizawahulumusa kulawa uko.

3 One wahaifisa uchanyha ya mulima Kalimeli,

nizawazahila na nizawalava uko.

One wahaifisa kuna yamazi mengi ya bahali,

nizalagiliza zoka diwalume.

4 One wehi wawo wahawagala kuuhami,

uko iviya nizalagiliza wakomigwe na mazele.

Nizawabunhulila meso yangu,

nizawaduwila siyo kuwatemela mate."

5 Mndewa Mulungu Yeli na Udahi,

kodalisa isi nayo yolumbuka,

wanhu wose wokala umo wokuwa na giyogiyo.

Isi yose yokwela na kuhumuluka,

fana viya lwanda lwa Naili lwa Misili vilumema na kuhunguka.

6 Mndewa Mulungu kazenga viheleto vake kuulanga na kwika vandusilo vake muna iisi.

Yeye koyatanga mazi ya bahali na koyetila muna iisi.

Mndewa Mulungu niijo zina jake.

7 Mndewa Mulungu kolonga, "Vino mweye Waisilaili kumwangu siyo fana Wakushi?

Vino siwalavile Waisilaili kuna iisi ya Misili?

Iviya siwalavile Wafilisiti kulawa kuna iisi ya Kafitoli na Washami kulawa kuna iisi ya Kili?

8 Niye Mndewa Mulungu noulola ufalume uli na uhasanyi na nizaunanga ulawe muna iisi.

Mbali sizawananga welesi wose wa Yakobo."

Mndewa Mulungu kolonga ivo.

9 Nizalava lagilizo na kuwabeta Waisilaili muna izisi zimwenga,

fana viya munhu viyobeta ngano,

muladi niwasegeze wose weli hawafaya.

10 Weli na uhasanyi mwa iwanhu wangu, wezakomigwa na zele,

wawo wolonga, "Uzidilwa hawizachipata na hawizachifika."

11 Siku yokwiza vondaniisimike kaye ya Daudi igwile.

Nizatenda ng'huta zake,

na kuzenga kaidi matongo yake.

Nizaizenga kaidi fana viikalile ichanduso,

12 muladi wawatawale Waedomu wasigale na wanhu wa zisi zimwenga zikalile zangu.

Mndewa Mulungu kolonga ivo.

13 Mndewa Mulungu kolonga,

"Siku zokwiza ndiya zizakuwa nyingi mbaka walimi wezapotwa kugobola zose.

Iviya zabibu zizakuwa nyingi mbaka wakamaji wezapotwa kukama zose.

Milima izalava divai inogile,

vilima vizakilima divai.

14 Nizawabweleza kaidi wanhu wangu Waisilaili wahamizigwe.

Wezazenga kaidi mabululu yalekigwe matongo na wezakala umo.

Wezahanda mizabibu na kung'wa divai yake.

Wezalima migunda na kuja ndiya zake.

15 Nizaweka Waisilaili muna iisi yawo wenyewo.

Hawezasegezigwa muna iisi iniweng'hile."

Mndewa Mulungu kolonga ivo.