1 Mndewa Mulungu kolonga,

"Wamoabu wagendelela kuhasanya,

ivo sizagalula lungilo jangu da kuwatagusa.

Kwaviya wasoma mavuha ya mfalume wa Edomu,

mbaka yawa maivu.

2 Nizatuma moto muna iisi ya Moabu,

wondautimbule mhongono za bululu da Keliosi.

Wanhu wa Moabu wezadanganika uko kuna zinyangi za ng'hondo na dizi da mhalati.

3 Nizamkoma mfalume wa Moabu,

hamwe na vinyandama wake wose."

Mndewa Mulungu kolonga ivo.

4 Mndewa Mulungu kolonga,

"Wanhu wa Yuda wagendelela kuhasanya,

ivo sizagalula lungilo jangu da kuwatagusa.

Kwaviya wayaleka malagilizo yangu,

na hawayazindilile.

Wavwiziligwa na milungu ija ija ya wasaho zawo wadanganike.

5 Nizatuma moto muna iisi ya Yuda,

wondautimbule mhongono za Yelusalemu."

6 Mndewa Mulungu kolonga,

"Wanhu wa Isilaili wagendelela kuhasanya,

ivo sizagalula lungilo jangu da kuwatagusa.

Wawachuuza kwa hela wanhu welibule ubananzi,

na ngayengaye kwa vilatu.

7 Wowabojoga ngayengaye,

na wowakimilila sekewapate haki zawo.

Munhu na tati yake wombandama mndele imwe,

ivo hawadihishimu zina jangu jelile.

8 Habehi ya chila lupango,

wanhu wogonela mawalo yowekile lehani ngayengaye.

Muna ikaye ya Mulungu wawo,

wong'wa divai yowaigulile kwa hela ziwapatile kwa ngayengaye.

9 Niwananga Waamoli haulongozi wawo,

nawo wakala watali fana mibiki ya mielezi,

wagangamala fana mibiki ya miyaloni,

Niyananga matunda yawo na mazizi yawo.

10 Nimulavani muna iisi ya Misili,

nimulongozani kufosa muna ichuwala kwa miyaka malongo mane,

mbaka mwiisola isi ya Waamoli kuwa yenu.

11 Nisagula walotezi muna iwanenu,

na wamwenga muna iwabwanga wenu kuwa Wanazili*.

Mweye Waisilaili, vino mbuli zonilonga siyo za kweli?"

Mndewa Mulungu kolonga ivo.

12 "Mweye muwang'wiza divai Wanazili,

na muwalongela walotezi sekewalotele.

13 Ivo nizamuhondani,

fana viya tololi dimemile ndiya vidihonda vinhu lusita vodifosa.

14 Na wanhu wodaha kukimbila ng'hani hawezadaha kwiibanga,

wanhu weli na nguvu wezamalilwa na nguvu zawo,

iviya magalu hawadaha kukombola ugima wawo.

15 Woitowela misale kuna ing'hondo hawezadaha kwima,

wanhu wodaha kukimbila ng'hani, hawezadaha kwiikombola,

na wakwelafalasi kwiing'hondo hawezadaha kuukombola ugima wawo.

16 Siku iyo wakalizi magalu ng'hani,

wezakimbila ukengele."

Mndewa Mulungu kolonga ivo.