1 Mndewa Mulungu kanilagusa chilaguso chimwenga. Niwona chigelo chimemile matunda yevile. 2 Maabaho Mndewa Mulungu kaniuza, "Amosi kowona choni?" Nimwidika, "Nowona chigelo chili na matunda yevile." Maabaho Mndewa Mulungu kanilongela, "Uhelelo wa wanhu wangu Waisilaili ufika, sizawawonela ubazi." 3 Mndewa Mulungu kolonga,

"Siku iyo nyila za kaye ya Mulungu zizagaluka kuwa ndilo,

kwizakuwa na mitufi mingi,

iviya mitufi iyo izakwasigwa chila hanhu chihupihupi."

4 Mutegeleze mweye muwawonela wanhu wolonda kutazigwa,

na mowagaza ngayengaye wa isi.

5 Moiuzagiza muna imizoyo yenu,

"Dugila da mwezi ukwima dizasegela zuwaki muladi chidahe kuchuuza ndiya zetu?

Siku ya Mhumulo izamala zuwaki, muladi chidahe kuchuuza ngano yetu?

Chizahunguza ningo na kongeza bei,

ivo chizawavwizila wanhu kwa ningo hazifaya.

6 Chizawagula ngayengaye kwa hela,

iviya chizawagula welibule chinhu kwa bei ya vilatu,

chizachuuza makang'ha ya ngano hamwe na ngano."

7 Mndewa Mulungu yeli ukulu wa Yakobo kailaha, kalonga,

"Kweli sizazimiza sang'hano zawo zihile ziwatendile.

8 Ivo isi izagudemeka na chila munhu mwiisi kezakuwa na ndilo,

isi yose izakwela na kuhulumuka,

fana mazi ya lwanda lwa Naili lwa Misili viyomema na kuhunguka."

9 Mndewa Mulungu kolonga,

"Siku iyo nizatenda zuwa diswe imisi,

na nizagala ziza imisi muna iisi.

10 Nizahindula madugila yenu kuwa ndilo,

na nyila zenu za deng'ho kuwa giyogiyo.

Nizamvazani maguniya yolagusa usungu,

na nizamuwegulani matwi yenu,

fana kuwa na giyogiyo da ndilo ya mwana yeli imwe muhala.

Uhelelo wa siku iyo wizakuwa wa usungu mkulu ng'hani."

11 Mndewa Mulungu kolonga,

"Siku zokwiza,

vondanigale nzala muna iisi.

Siyo nzala ya ndiya hebu ng'hilu ya mazi,

mbali nzala ya kuhulika mbuli ya Mndewa Mulungu.

12 "Wanhu wezawegela kulawa bahali mbaka bahali

na kulawa ubanzi wa kasikazi

mbaka ubanzi wa ulawilo wa zuwa.

Wezakimbila uko na uko kuzahila mbuli ya Mndewa Mulungu,

mbali hawezaiwona.

13 Siku iyo wandele wanogile na wabwanga wezasinduka kwa ng'hilu.

14 Waja woilaha kwa chinyala cha mulungu wa uvwizi wa Samalia, kwa kulonga,

‘Fana milungu ya uko Dani voikala,’

hebu ‘Fana mulungu wa Belisheba viyokala’,

wawo iviya wezadanganika na hawezakwinuka kaidi."