1 Mwizagaya mweye womuilegeha uko Sayuni,

na mweye mukala hana ihanhu hanogile kuna umulima wa Samalia,

mweye mowoneka watawala wa isi ng'hulu,

Waisilaili wose wohita kumwenu kutazigwa.

2 Hiteni Kaline mukalole.

Kulawa uko muhite kuna dibululu kulu da Hamasi,

Maabaho muhulumuke mbaka Gasi kwa Wafilisiti.

Vino falume zawo hazinogile kufosa izenu na isi yawo haili ng'hulu kufosa iyenu?

3 Moyehula siku ija ihile ikwiza,

mbali kwa kusang'hana usede molopola kugala magayo.

4 Mwizagaya mweye mugonela makomwa ya meno ya nhembo,

na kwiigolosa uchanyha ya makomwa yawo,

kuno moja nyama za wanang'hondolo na nyama za madang'ang'a.

5 Mweye molonda kwimba chakachaka na madizi ya vinubi,

na kutenda via vimwenga va nyila kwa kumuhiga mfalume Daudi.

6 Mong'wa divai muna yamahamha,

na moiboboda mavuta yonung'hila goya,

mbali hamwizakuwa na usungu Waisilaili vondawagazigwe.

7 Mwizakuwa wa mwanduso kuhita kuuhami,

na madugila yenu ya kuilegeha yezamala.

8 Mndewa Mulungu kailaha kwa muhe wake,

Mndewa Mulungu Yeli na Udahi kalonga,

"Noyehila ng'hani magoda ya welesi wa Yakobo,

iviya nozihila mhongono zawo.

Bululu jawo na vinhu vose vili umo, nizaweng'ha wehi wawo."

9 One wanhu longo wahasigala muna ikaye imwe, wose wezadanganika. 10 One yaheza ndugu wa wanhu wadanganike kuilava mitufi kunze isomigwe na kumuuza yoyose yondayawe muna ikaye, "Vino kuna munhu imwenga hamwe na weye?" Nayo kezamwidika, "Aka!" Ndugu iyo kezamulongela, "Nyamala hupi! Sekechiditambule zina da Mndewa Mulungu."

11 Lola! Kwaviya Mndewa Mulungu kolagiliza,

kaye ng'hulu yotulika vihande vihande,

kaye ndodo yokeng'enheka.

12 Vino falasi wodaha kukimbila muna yamabwe makulu?

Vino munhu kodaha kulima bahali kwa ng'ombe walume?

Mbali mweye mugalula kuhumiza voilondeka kuwa fana daka,

na tunda da haki kuwa usungu.

13 Mweye modeng'helela kudihuma bululu da Lodebali,

kuno molonga, "Vino hachidisolile bululu da Kalinaimu kwa nguvu zetu wenyewo?"

14 Mndewa Mulungu Yeli na Udahi kolonga,

"Mweye Waisilaili, kweli nizawagala wanhu wa isi imwenga weze kumtowani.

Wanhu wawo wezamgazani kwandusila kasikazi ya Lebohamasi mbaka chizanda cha Alaba chili ubanzi wa kusi."