1 Mweye Waisilaili, tegelezeni mbuli iyalongile Mndewa Mulungu kusonhela mweye. Tegelezeni mweye Waisilaili mose wonimulavileni Misili,

2 "Muna izisi zose,

nimsagulani mweye,

ivo nizamtagusani,

kwa ichimu cha uhasanyi wenu wose."

3 Vino wanhu waidi wodaha kugenda hamwe,

bila ya kuilumba?

4 Vino simba kotongoloma kumbago one hanapata nyama?

Vino simba mkali kotongoloma muna dituka jake,

one hanagwila chinhu?

5 Vino ndege kodaha kwenzeka muna umtego ulibule chambo?

Vino mtego wodaha kufatuka,

one haudalisigwe na chochose?

6 Vino mhalati ya ng'hondo yolila kuna dibululu,

wanhu hawagudemeka?

Vino one bululu dahapata hulo,

hadigaligwe na Mndewa Mulungu?

7 Kweli Mndewa Mulungu hatenda chinhu,

bila kuwagubulila wasang'hani wake walotezi.

8 Simba katongoloma.

Vino yelihi hadumba?

Mndewa Mulungu wetu kolonga,

yelihi yolema kuulonga usenga wake?

9 Gong'ondeni muna zimhongono za Ashidodi na mhongono za isi ya Misili,

"Iduganyeni kuna imilima ya Samalia,

Mulole mbuli zihile zitendigwa uko na wanhu wogazigwa uko."

10 Mndewa Mulungu kolonga,

"Wanhu wangu hawavimanyile kutenda mbuli zinogile,

muna zikaye zawo wamemeza vinhu vihile viwabawile."

11 Ivo Mndewa Mulungu kolonga,

"Wehi wezaizinga isi yenu,

wezamuhokani mhongono zenu na kuzinanga."

12 Mndewa Mulungu kolonga,

"Fana viya mdimi viyokombola muna umulomo wa simba mivuha midi ya mgulu hebu chihande cha gutwi,

ivo niivo Waisilaili vondawakomboligwe.

Waja wokala Samalia vondawakomboligwe wezasigala na chihande cha komwa na chihande cha chigoda muhala."

13 Mndewa Mulungu Yeli na udahi kolonga,

"Tegelezeni, mkawazume welesi wa Yakobo.

14 Siku yondaniwataguse Waisilaili kwa ichimu cha uhasanyi uwatendile,

nizalunanga chila lupango lwa Beseli,

nizakanha mahembe ya chila lupango na kuyagwisa hasi.

15 Nizazinanga kaye zose muna yamabululu na vibululu,

nizazibomola kaye zihambigwe kwa meno ya nhembo,

kaye ng'hulu zizakugwa."

Mndewa Mulungu kolonga ivo.