1 Mweye Waisilaili, tegelezeni vonimulililani.

2 Weye mhambe Isilaili!

Kudanganika na hwizakwinuka kaidi.

Kulekigwa wiidumwe muna iisi yako,

habule munhu wa kukwinula.

3 Mndewa Mulungu kolonga,

"Kumwenu mweye Waisilaili,

wanhu 1,000 wezahita kuitowa kuna ing'hondo,

mbali wezabwela wanhu gana muhala.

Wanhu gana wezahita kuitowa kuna ing'hondo,

mbali wezabwela wanhu longo muhala."

4 Mndewa Mulungu kowalongela Waisilaili,

"Izoni kumwangu mwizakuwa wagima.

5 Mbali sekemuhite kutambika uko Beseli hebu Giligali,

hebu sekemuloke kuhita Belisheba.

Kwaviya wakaya wa Giligali kweli wezagaligwa kuuhami,

na bululu da Beseli dizanangigwa."

6 Hiteni kwa Mndewa Mulungu na mwizakuwa wagima!

One siivo, kezawananga welesi wa Yosefu fana moto vouzipuka,

wondauwatimbule wakaya wa Beseli,

na habule munhu yondayadahe kuuzima.

7 Mweye mugalula kuhumiza voilondeka kuwa daka,

na kuiwona haki fana unyolodo.

8 Iyo yatendile vibugulu va nhondo zitangigwa Chilimila na Homauhome,

yogalula ziza totolo kuwa imitondo,

na imisi kuwa ichilo,

yoduganya mazi ya bahali,

na kuyetila muna iisi inyalile,

Mndewa Mulungu niijo zina jake.

9 Yeye niiyo yowananga weli na nguvu,

na kubananga mhongono zawo zigangamale.

10 Mweye mowehila wanhu wohumiza voilondeka,

na mowehila waja wolonga ukweli kuna ichitala.

11 Mweye mowabamanya ngayengaye,

na mowalonda wamwing'heni kodi ya ngano.

Moizengela kaye ya mabwe ya kusongola,

mbali mweye hamwizakala umo.

Molima vizi vinogile va mizabibu,

mbali hamwizakung'wa divai yake.

12 Kwaviya niye nivimanya viya vimbanange ng'hani,

na ukulu wa uhasanyi wenu.

Mweye mowagaza wanhu wanogile na mohokela lushwa,

na kukimilila ngayengaye sekewahumizigwe voilondeka kwiichitala.

13 Ivo munhu yeli na ubala kezanyamala,

kwaviya lusita ulo lwiha.

14 Molondeka muleke kutenda mbuli zihile na mutende mbuli zinogile,

muladi muwe wagima.

One muhatenda ivo, Mndewa Mulungu Yeli na Udahi,

kezakuwa hamwe na mweye,

fana vimulonga.

15 Muzihile mbuli zihile na mulonde mbuli zinogile.

Muhumize voilondeka muna ichitala,

yodahika Mndewa Mulungu Yeli na Udahi,

kezawatendela mbuli zinogile wanhu wasigale wa kabila da Yosefu.

16 Ivo Mndewa Mulungu, Mulungu Yeli na Udahi, kolonga,

"Wanhu wezalila muna zinzila zose,

Wezalila, ‘Chizagaya! Chizagaya!’

Walimi wezatangigwa kwiza kulila,

magalu wa kulila wezakwiza kulila.

17 Wanhu wezalila muna imigunda yose ya mizabibu,

kwaviya nizafosa hagati yenu kumtagusani."

Mndewa Mulungu kolonga ivo.

18 Mweye womuigozela ng'hani siku ya Mndewa Mulungu ya kutagusa,

habali moilonda ng'hani siku iyo?

Siku iyo izakuwa siku ya ziza siyo ya bung'hulo.

19 Izakuwa fana munhu yakimbile simba,

maabaho koiting'hana na duma.

Izakuwa fana munhu yobwela kuna ikaye yake,

na kwika mkono wake muna nhumba na kulumigwa na zoka.

20 Siku ya Mndewa Mulungu ya kutagusa izakuwa siku ya ziza totolo siyo ya bung'hulo,

Izakuwa siku ya magayo siyo ya kudeng'helela.

21 Mndewa Mulungu kolonga,

"Noyehila na noyehula madugila yenu,

siideng'helela miting'hano yenu ya kutambika.

22 One muhanilavila nhambiko zenu za kutimbula na nhosa za mhule,

sizatogola kuzihokela,

na nhambiko zenu za kugala tindiwalo za wanyama wanenehe,

sizazilola!

23 Lekeni kwimba kwa kulandula dizi.

Silonda kuhulika nyila za vinubi venu.

24 Mbali lekeni kuhumiza voilondeka kukilime fana mazi,

kutenda mbuli zinogile kuwe fana lwanda halunyala.

25 "Mweye Waisilaili, lusita luja vimukalile kudibwilingu miyaka malongo mane. Vino munigalila nhosa na nhambiko ya kutimbula hata mwanza umwe? 26 Muitambikila milungu ya uvwizi ya Sikusi, yeli mfalume wenu, iviya Chiyuni mulungu wenu wa nhondo. Mutambikila vinhu vomuvitendile wenyewo. 27 Ivo nizamgalani kuuhami kutali kufosa bululu da Damasiki!"

Mndewa Mulungu Yeli na Udahi kolonga ivo.