1 Mbuli ya Amosi, imwe wa wadimaji wa wanyama wa bululu da Tekoa. Mulungu kamgubulila Amosi mbuli zino zose kuwasonhela Waisilaili miyaka midi ding'hali hadinalawilila gudemeko da isi. Lusita ulwo Uzia kakala mfalume wa Yuda na Yeloboamu mwana Yehoashi kakala mfalume wa Isilaili.

2 Amosi kalonga,

"Mndewa Mulungu koduma kulawa mulima Sayuni,

kolava dizi jake kulawa Yelusalemu,

mbaka migunda ya mgina ya wadimaji yonyala,

misavu ya mulima wa Kalimeli yonyala."

3 Mndewa Mulungu kolonga,

"Wanhu wa Damasiki wagendelela kuhasanya ng'hani

ivo sizagalula lungilo jangu da kuwatagusa,

kwaviya wawakanhakanha wanhu wa Gileadi fana wokanha vinhu vihandigwe mumgunda kwa magembe na via va zuma.

4 Baho nizatuma moto muna ikaye ya Hazaeli,

wondauzitimbule mhongono za Beni Hadadi.

5 Nizaubena lwivi lukulu lwa bululu da Damasiki,

na kumsegeza mtawala wa kolongo da Aveni,

yotawala Besi Edeni.

Wanhu wa Shamu wezagaligwa kuuhami uko Kili."

Mndewa Mulungu kalonga ivo.

6 Mndewa Mulungu kolonga,

"Wanhu wa Gaza wagendelela kuhasanya ng'hani,

ivo sizagalula lungilo jangu da kuwatagusa.

Wawagwila wanhu wengi,

na wawachuuza fana watumwa kwa Waedomu.

7 Ivo nizatuma moto muna zing'huta za bululu da Gaza,

wondautimbule mhongono zake.

8 Nizamsegeza mtawala wa bululu da Ashidodi,

yokwamha fimbo ya chifalume umo Ashikeloni.

Nizagolosa mkono wangu kuditagusa bululu da Ekiloni.

Wafilisiti wose wasigale wezanangigwa."

Mndewa Mulungu kolonga ivo.

9 Mndewa Mulungu kolonga,

"Wanhu wa Tilo wagendelela kuhasanya ng'hani,

ivo sizagalula lungilo jangu da kuwatagusa.

Wawagwila wanhu wengi na kuwagala Edomu.

Hawategeleze lagano da umbwiya diwatendile.

10 Ivo nizatuma moto muna zing'huta za bululu da Tilo,

wondautimbule mhongono zake."

11 Mndewa Mulungu kolonga,

"Wanhu wa Edomu wagendelela kuhasanya ng'hani,

ivo sizagalula lungilo jangu da kuwatagusa.

Wawasepa ndugu zawo kwa mazele,

walema kuwawonela ubazi.

Ludoko lwawo longezeka lusita lose,

na ng'hasiliki zawo ziiyoha siku zose.

12 Ivo nizatuma moto muna dibululu da Temani,

wondautimbule mhongono za Bosila."

13 Mndewa Mulungu kolonga,

"Wana wa Amoni wagendelela kuhasanya ng'hani,

ivo sizagalula lungilo jangu da kuwatagusa.

Muna ing'hondo yawo ya kusola isi, wawatula izinda wanaake weli na wimo muna iisi ya Gileadi.

14 Ivo nizatuma moto muna zing'huta za mabululu ya Laba,

wondauzitimbule mhongono zake.

Siku iyo ya ng'hondo, kwizakuwa na kuguta ng'hani,

keyakeya dizakuwa kulu fana vulavumbi.

15 Mfalume wa Amoni kezahita kuutumwa,

hamwe na vinyandama wake wose."

Mndewa Mulungu kolonga ivo.