1 Tegelezeni, siku ziya na lusita luja,

nizawatemela mate kaidi wanhu wa Yuda na Yelusalemu.

2 Nizawaduganya wanhu wa zisi zose,

nizawagala kuna dikolongo da Yehoshafati.

Uko nizawahumiza kwa ichimu cha wanhu wangu weli uhazi wangu,

kwaviya wawapwililisa Waisilaili muna izisi zimwenga na waigola isi yangu.

3 Iviya wawatowela mhiya wanhu wangu,

na wawachuuza wabwanga muladi wapate malaya,

na wawachuuza wandele muladi wapate divai wang'we.

4 Mweye wanhu wa Tilo na Sidoni na wanhu wa zisi zose za Filisiti, molonda choni kumwangu? Vino monilihilizila kwa mbuli zonitendile? Nizambwelezelani himahima mbuli zomunitendele. 5 Kwaviya musola hela na zahabu yangu, musola vinhu vangu vinogile na muvingiza muna zikaye za milungu yenu. 6 Muwachuuza wanhu wa Yuda na wanhu wa Yelusalemu kwa Wagiliki. Muwahamiza kutali na zisi zawo. 7 Nizawatenda walawe hanhu homuwachuuze. Nizamulihilizani kwa chila chinhu chimuwatendele. 8 Nizawachuuza wanenu wa chilume na wanenu wa chike kwa wanhu wa Yuda, nawo wezawachuuzila wanhu wa isi ya Sheba ili kutali ng'hani. Niye Mndewa Mulungu nilonga.

9 Wagong'ondeleni wanhu wa zisi mbuli zino,

muisasale kwa ng'hondo na muwatange magalu,

watowang'hondo weze kuitowa.

10 Noleni magembe yenu yagaluke kuwa mazele,

na sengo zenu zigaluke kuwa migoha,

maabaho munhu nyondenyonde yalonge, "Niye galu."

11 Mweye wanhu wa zisi zose na banzi zose, izoni himahima,

muiduganye hamwe.

Weye Mndewa Mulungu, wahulumuse watowang'hondo wako.

12 Wanhu wa zisi weze kuna dikolongo da Yehoshafati,

kwaviya nizakala uko kuwahumiza wanhu wa zisi zili banzi zose.

13 Sasaleni sengo, kwaviya ndiya kumgunda ziva.

Izoni mukame zabibu, kwaviya zimema.

Wihi wawo uiyoha fana divai imemile ng'hani.

14 Lung'husesa lwa wanhu wamema muna dikolongo da nhaguso.

Kwaviya siku ya Mndewa Mulungu ya kutagusa yahabehi.

15 Zuwa na mwezi vigumigwa ziza,

nhondo nazo hazibung'hula.

16 Mndewa Mulungu koduma kulawa Sayuni ili uko Yelusalemu,

dizi jake dotenda ulanga na isi vitingisike.

Mbali Mndewa Mulungu kowagombela wanhu wake,

kowakaliza Waisilaili.

17 Maabaho mwizavimanya kuwa niye Mndewa Mulungu, Mulungu wenu,

nokala Sayuni, mulima wangu welile,

Yelusalemu dizakuwa bululu jelile,

wanhu wa zisi zimwenga hawezadisola kaidi.

18 Siku iyo milima izalagaza divai ili mulile,

vilima vizakilima maziwa,

vizanda vose vili muna iisi ya Yuda vizalava mazi mengi.

Nzasa zizalawilila muna ikaye ya Mndewa Mulungu

na kudimemeza mazi kolongo da Shitimu.

19 "Isi ya Misili izakuwa matongo,

na isi ya Edomu izakuwa bwilingu,

Kwaviya wawatowa wanhu wa Yuda welibule ubananzi.

20 Mbali isi ya Yuda na Yelusalemu zizakuwa na wanhu siku zose na nyelesi zose.

21 Niye Mndewa Mulungu nokala Sayuni,

nizawalihiliza wanhu wakomile."