1 Mndewa Mulungu kamulongela Yoeli mwana wa Pesueli,

2 "Tegelezeni mbuli ino, mweye walangulizi wa Yuda,

kingeni digutwi mweye mose womukala muna iisi.

Vino mbuli fana zino zimulawililani mweye hebu wasaho zenu?"

3 Walongeleni wanenu mbuli ino,

wanenu wawalongele wanawo.

Iviya wanawo wawalongele nyelesi zawo zikwiza.

4 Madali ya nzige wagwila muna imimea,

mimea ilekigwe na nzige idigwa na mbalangulu,

mimea ilekigwe na mbalangulu idigwa na ngeda,

mimea ilekigwe na ngeda idigwa na viduludulu.

5 Mweye wang'waji lamkeni mulile,

mweye mukoligwa divai, mulawe masozi,

kwaviya muhokigwa zabibu zose kulawa muna imilomo yenu.

6 Dali da nzige waibananga isi yetu,

wana nguvu na madali makulu yodumbiza.

Meno yawo yalinga fana meno ya simba,

saya zawo zilinga fana saya za simba zike.

7 Wabananga mizabibu yetu,

na waja minhini yetu,

wabandula magome na wayasa hasi,

waleka matambi yabule mayani.

8 Lileni fana viya mndele yaiyawale guniya,

viyomulilila mulume yolonda kumsola.

9 Nhosa za mhule na nhosa za ving'waji hazigaligwa muna ikaye ya Mndewa Mulungu.

Wakulu wa nhambiko womsang'hanila Mndewa Mulungu wolila.

10 Migunda isigala yabule chinhu chochose,

isi yolila,

kwaviya vinhu vihandigwe vibanangigwa,

divai haipatika na mavuta habule.

11 Ngano na shayili vinangigwa vose,

mweye walimaji, lileni,

mweye ndolezi wa mizabibu, laveni masozi,

kwaviya mavuno yose muna iisi yaga.

12 Mizabibu iholola,

minhini yose inyala,

mikomamanga na mitende na michungwa inyala,

mibiki yose ya matunda inyala.

Iviya kudeng'helela kwa wanhu kunyala.

13 Mweye wakulu wa nhambiko,

valeni maguniya mulile,

lileni mweye womusang'hana hana ulupango.

Ingileni muna ikaye ya Mulungu mulile ichilo chose!

Kwaviya nhosa za mhule na nhosa za ving'waji hazigaligwa muna ikaye ya Mulungu wenu.

14 Walongeleni wanhu wafunge kuja,

wagonekeni wanhu weze kuna umting'hano welile.

Waduganyeni walangulizi na wanhu wokala muna iisi,

muna ikaye ya Mndewa Mulungu, Mulungu wenu.

Umo mukamulilile Mndewa Mulungu.

15 Siku iyo chizagaya ng'hani!

Kwaviya siku ya Mndewa Mulungu yahabehi,

yokwiza hamwe na kunangigwa kulawa kwa Mulungu Yeli na Udahi.

16 Ndiya zetu zibanangigwa kuno cholola,

na habule munhu yodeng'helela muna ikaye ya Mulungu wetu.

17 Mbeyu zowola hana uulongo,

madungu yasigala yabule chinhu,

vibanda va kwikila ndiya vibeneka,

kwaviya baho habule ngano.

18 Lola wanyama viwolila kwa usungu!

Mabumbila ya ng'ombe yoyunguya yozahila ndiya,

mbali habule mgina,

iviya mabumbila ya ng'hondolo yogaya.

19 Mndewa Mulungu, nokulamba weye,

moto ukomeleza mgina kuchuwala,

milambi ya moto itimbula mibiki kuna imigunda.

20 Wanyama wa kumbago wokuhuwila weye,

kwaviya vizanda vinyala,

na moto ulunguza mgina kuchuwala.