1 Mweye Waisilaili, mbweleleni Mndewa Mulungu, Mulungu wenu,

kwaviya muikwala kwa ichimu cha uhasanyi wenu.

2 Mbweleleni Mndewa Mulungu na mumulongele,

"Uchilekelele uhasanyi wetu wose,

na uhokele vinhu vetu vinogile muladi chikutogoze weye fana viya chihalavile nhambiko ya ng'ombe.

3 Ashulu haizachikombola,

hachizahuwila kaidi falasi wa ng'hondo,

hachizalonga kaidi, ‘Milungu yetu’

nyang'hiti zochisongole wenyewo,

kwaviya weye kowawonela ubazi wachiwa."

4 Mndewa Mulungu kolonga, "Nizawatenda wanhu wangu wanibwelele,

nizawalonda kaidi kwa moyo wangu wose,

kwaviya ludoko lwangu lumala kumwawo.

5 Nizakuwa fana nhungwe kwa Waisilaili,

nawo wezakwalika fana maluwa yayungiyungi,

wezakuwa na mazizi fana mibiki ya Lebanoni.

6 Matambi yake yezakwanzanza,

unovu wake wizakuwa fana mbiki wa mzaituni,

mnung'ho wake unoga fana mbiki wa Lebanoni.

7 Wawo wose wokala hasi ya sisila jake,

wezazilibuka fana ngano,

Wezabwela na nizawakaliza,

wezakwalika maluwa fana mzabibu,

mnung'ho wake wizakuwa fana mnung'ho wa divai ya Lebanoni.

8 Mweye Waisilaili, vino nyang'hiti za milungu zomtazani choni?

Niye notegeleza mbuli zenu zomupula.

Niye nilinga fana mbiki uli na mayani mabisi siku zose,

mwizapata matunda yenu kulawa kumwangu."

9 Mweye wanhu wa Isilaili,

munhu yeli na ubala yavimanye,

kuwa nzila ya Mndewa Mulungu igoloka.

Wanhu wotenda mbuli zinogile woisondelela,

mbali wahasanyi woikwala umo.