1 Mbuli ya Mndewa Mulungu imwizila Hosea mwana wa Beeli muna zisiku za utawala wa Uzia na utawala wa Yosamu na utawala wa Ahazi na utawala wa Hezekia viwakalile wafalume wa Yuda. Iviya lusita lwa utawala wa Yeloboamu mwana wa Yehoashi mfalume wa Isilaili.

2 Mndewa Mulungu viyanduse kulonga na Hosea, kamulongela, "Hita ukasole muke wa ugoni na weleke nayo wana wa ugoni, kwaviya wanhu wa isi ino wotenda ugoni ng'hani na hawanigesa." 3 Ivo kahita kumsola Gomeli mwana wa Dibilaimu. Maabaho Gomeli kapata wimo na keleka mwana wa chilume.

4 Mndewa Mulungu kamulongela Hosea, "Mwing'he zina Yezileeli*", kwaviya lung'hali lusita luguhi nizawatagusa welesi wa Yehu kwa ukomaji uyatendile muna dibawe da Yezileeli. Nizaukomeleza ufalume wa Isilaili. 5 Siku iyo nizasegeza nguvu za watowang'hondo wa Waisilaili kuna dibawe da Yezileeli.

6 Gomeli kapata wimo kaidi na keleka mwana wa chike. Maabaho Mndewa Mulungu kamulongela Hosea, "Mwing'he zina Lo Luhama*, kwaviya sizawawonela ubazi kaidi Waisilaili na sizawalekelela. 7 Mbali nizawawonela ubazi wanhu wa Yuda na kuwakombola na kuwalopola. Niye Mndewa Mulungu, Mulungu wawo nizawakombola, mbali siyo kwa mhinde na misale hebu zele hebu ng'hondo hebu falasi hebu wakwelafalasi."

8 Gomeli viyamulekeze tombo Lo Luhama, kapata wimo na keleka mwana wa chilume. 9 Mndewa Mulungu kamulongela, "Iyo mtange Lo Ami*", kwaviya mweye siyo wanhu wangu na niye siyo Mulungu wenu.

10 Mbali peta ya Waisilaili izakuwa ng'hulu fana msanga wa bahali, hawadaha kupeteka hebu kulingigwa. Hanhu hawalongeligwe, "Mweye siyo wanhu wangu," wawo wezatangigwa "Wana wa Mulungu yeli mgima." 11 Wanhu wa Yuda na wanhu wa Isilaili wezailumba kaidi, wawo wezamsagula mtawala imwe na wezakala goya muna iisi, kwaviya siku ya Yezileeli izakuwa ng'hulu ng'hani.