1 "Toweni mhalati,

mwihi kokwiza muna ikaye ya Mndewa Mulungu fana masumula,

kwaviya wanhu wadibena Lagano jangu, wayaleka malagilizo yangu.

2 Waisilaili wonililila,

‘Weye Mulungu wetu, chovimanya kuwa weye Mulungu wetu.’

3 Mbali Waisilaili wazehula mbuli zinogile,

ivo mwihi kezawasondelela.

4 "Niye siwalongele wawasagule wafalume,

waisagulila watawala waja niye siwamanyile,

waitendela nyang'hiti za milungu kwa hela na zahabu,

mbuli iyo yowananga.

5 Mweye wanhu wa Samalia, noihila nyang'hiti yenu ya dang'ang'a.

Nomuwonelani ludoko,

vino mwizagendelela kuwa na uhasanyi mbaka zuwaki?

6 Nyang'hiti ija ilawa Isilaili, isongoligwa na fundi,

siyo Mulungu,

kweli nyang'hiti ya dang'ang'a ya Samalia izabenigwa vihande vihande.

7 "Kwaviya wohanda mbeho, wezagobola vulavumbi,

mimeya yawo ya ngano yoikwima muna imigunda, haizalava ngano yoyose,

na one yahema, ndiya yake izasoligwa na manyambenyambe.

8 Waisilaili wameligwa,

sambi wahamwe na wanhu wa zisi zimwenga,

fana chia hachifaya.

9 Kwaviya wahita Ashulu,

fana chihongwe wa kumbago yeli yaidumwe,

wawaliha hela watawala wa Ashulu muladi wawakalize.

10 Mbali ingawa watogola kuwaliha hela wanhu wa zisi zimwenga,

nizawaduganya hamwe kuwatagusa.

Mfalume mkulu wa Ashulu kezawatenda wagaye ng'hani.

11 "Ingawa wanhu wa Isilaili wazenga chila lupango lwa kutimbulila nhambiko,

chila lupango lwawo luwa hanhu ha kutendela uhasanyi.

12 Niwandikila malagilizo yangu miyanza mingi,

mbali wayatenda fana hawayamanyile.

13 Wonilavila nhambiko,

na woja nyama,

mbali niye Mndewa Mulungu sinogelwa nawo.

Nizazikumbuka mbuli zawo zihile,

na nizawatagusa kwa uhasanyi wawo uwatendile.

Maabaho wezabwela Misili.

14 Kwaviya Waisilaili wamzimiza ija Yawalumbile,

waizengela kaye ya chifalume,

na wanhu wa Yuda wongeza mabululu yeli na mhongono,

mbali niye nizayagalila moto mabululu yayo, iviya nizazitimbula mhongono zawo."