1 Wanhu wa kabila da Efulaimu viwalongile, kukala na gudemeko,

watogozigwa umo Isilaili,

mbali watenda uhasanyi kwa kumtambikila mulungu Baali na wadanganika.

2 Wanhu wa kabila da Efulaimu waiyoha kutenda uhasanyi, waitendela nyang'hiti za chuma kwa nzewele zawo,

nyang'hiti za hela zitendigwe vinogile ng'hani, zose zitendigwa na mafundi,

yolongigwa kusonhela wanhu wano, "Wolava nhambiko

na wononela nyang'hiti za madang'ang'a!"

3 Lelo wanhu wawo wezakuwa fana kungugu da imitondo,

hebu fana nhungwe yoisegela himahima,

fana viya makang'ha viyohembelusigwa hanhu ha kubetela,

na fana yosi vodilawa muna dibomba.

4 Mbali niye niiyo Mndewa Mulungu, Mulungu wenu,

yonimulavileni muna iisi ya Misili.

Muvimanye kuwa habule Mulungu imwenga mbali niye.

Iviya habule mulopozi imwenga mbali niye.

5 Nimulolani goya vomukalile kwiichuwala,

muna iisi ili na ng'hangu.

6 Vinimwing'hileni ndiya, muja na mwiguta,

muwa na magoda,

lekamana munizimiza.

7 Lelo nizakuwa fana simba kumwenu,

nizamsepani fana duma muna inzila.

8 Nizamzumhilani fana dubu yahokigwe wanage,

na nizamvavatulani mhambaga zenu.

Uko nizamjani fana simba,

nizamvavatulani fana mnyama mkali.

9 Weye Isilaili, kunangigwa,

kwaviya weye huli ubanzi wangu,

huli ubanzi wa mtazi wako.

10 Lelo mfalume wako kakulihi yondayakukombole muna yamabululu yako yose?

Walamuzi wako wouwalongile vino,

"Ning'heni wafalume na watawala."

11 Nikwing'ha mfalume vinikalile na ludoko,

nimsegeza kwa ng'hasiliki yangu.

12 Uhasanyi wa wanhu wa Isilaili wikigwa ngama,

uhasanyi wawo wikigwa goya kwa kwandikigwa.

13 Kezapata usungu fana wa muke yolumwa usungu,

mbali yeye ni mwana yeli mbozi,

kwaviya lusita lufika mwana kokalama kulawa

muna umunda wa mami yake.

14 Vino nolondeka niwakombole wanhu wano kulawa kuzimu?

Vino nolondeka niwakombole wanhu wano kulawa kwiifa?

Weye ifa ugale nguvu zako,

weye kuzimu ugale kunanga kwako.

Sizawawonela ubazi kaidi.

15 One Isilaili yahatelela fana mayani,

niye Mndewa Mulungu nizagala beho kulu da ulawilo wa zuwa,

beho dondadilawe kuchuwala,

iviya masima na nzasa zizanyala.

Dungu jake dizasoligwa,

hamwe na ngama zake zose.

16 Wanhu wa Samalia wezatagusigwa kwa mbuli zawo zihile,

kwaviya wamulema Mulungu wawo,

wezakomigwa kwa mazele,

iviya wana wawo wezahondigwa,

wanaake weli na wimo wezatumbuligwa.