1 Mweye Waisilaili, tegelezeni mbuli za Mndewa Mulungu.

Mndewa Mulungu kowalonga wanhu wokala muna iisi.

Habule kaidi uwaminika hebu ulondo wa kufunya umoyo muna iisi,

habule munhu yommanya Mulungu muna iisi ino.

2 Habule mbuli imwenga ila kuduwila na uvwizi na ukomaji,

ubavi na ugoni ulibule mhaka na kukoma wanhu.

3 Ivo isi yose yonyala,

na wakaya wake wose

hamwe na wanyama wa kumbago na ndege wa kuulanga, mbaka somba wa muibahali wodanganika.

4 Mbali wanhu sekewailonge na sekewaikalikile,

kwaviya wanhu wako walinga fana wanhu wowalonga wakulu wa nhambiko.

5 Weye kwizaikwala imisi,

mulotezi wa uvwizi kezaikwala hamwe na weye ichilo.

Nizawananga wanhu wako Waisilaili.

6 Wanhu wangu wanangigwa kwaviya hawavimanyile,

kwaviya weye kulema kuvimanya,

na niye nokulema sekeuwe mkulu wa nhambiko.

Kwaviya kuzimiza malagilizo ya Mulungu,

niye iviya nizawazimiza wanago.

7 Wakulu wa nhambiko viwongezeke,

niivo viwaiyohile kunihasanya,

lelo nizahindula hishima zawo kuwa chinyala.

8 Woigutiza kwa nhambiko za wanhu wangu weli na uhasanyi,

wodeng'helela wanhu viwotenda uhasanyi.

9 Wanhu wezakuwa fana wakulu wa nhambiko,

nizawatagusa kwa ichimu cha ugenzi wawo,

nizawaliha kwa sang'hano zawo.

10 Wezakuja, mbali hawezakwiguta,

wezaibandama fana malaya, mbali hawezapata wana,

kwaviya wanileka niye Mndewa Mulungu na watambikila milungu imwenga.

11 Ugoni na divai ya sambi vomtenda munhu sekeyavimanye.

12 Wanhu wangu wolonda kutazigwa na nyang'hiti ya biki,

nyang'hiti yawo ya biki yowalagulila, kwaviya muhe wa ugoni uwagiza,

wamuleka Mulungu wawo.

13 Wolava nhambiko kuchanyha ya milima,

na wolava nhambiko kuna ivilima,

hasi ya mibiki ya migude na mipela

kwaviya mbeho zake zinoga.

Ivo wandele wenu wotenda ugoni,

na mwali wenu yosoligwa kotenda ugoni.

14 Wanenu wa chike wahatenda ugoni sizawatagusa,

hebu wake wa wanenu wahatenda ugoni,

kwaviya walume wenyewo wosondelela ugoni,

na wotambika hamwe na malaya.

Wanhu wano hawahulika ukweli wezanangigwa.

15 Mweye Waisilaili ingawa mutenda ugoni,

sekemuwaleke wanhu wa Yuda watende uhasanyi.

Sekemuhite Giligali hebu Besi Aveni

Sekemuilahe kwa kulonga, "Fana Mndewa Mulungu viyokala."

16 Waisilaili watatali fana vihongwe,

lelo habali Mndewa Mulungu yawadime,

fana mwanang'hondolo kuna yamayani magalamu?

17 Waisilaili wailumba na nyang'hiti, waleke wagendelele.

18 Wahakomeleza kung'wa upele,

wohita kuzahila malaya,

wolonda chinyala kufosa hishima yawo.

19 Beho kulu dizawapwililisa,

na nhambiko zawo zizawaguma chinyala.