1 Wanhu wa Isilaili wotenda ubozi kwa kuilisa beho na kuilumba na beho da ubanzi wa ulawilo wa zuwa,

wokongeza uvwizi na unanzi,

wotenda lagano na Waashuli, mavuta yogaligwa Misili.

2 Mndewa Mulungu kana mbuli na wanhu wa Yuda,

kezamtagusa Yakobo kwa mbuli ziyatendile,

na kezamuliha kwa sang'hano yake.

3 Yakobo viyakalile mmunda kamha chisiginho cha sekulu wake,

viyawile mkulu kaihuma na Mulungu.

4 Yakobo kaihuma na msenga wa kuulanga,

Yakobo kamuhuma, mbali kalila na kampula msenga iyo yamtemele mate.

Mulungu kamwizila Yakobo uko Beseli na kalonga nayo.

5 Mndewa Mulungu Yeli na Udahi,

Mndewa Mulungu niijo zina jake!

6 Mumbwelele Mndewa Mulungu, Mulungu wenu,

muwe na ulondo wa kufunya umoyo na mutende viya voilondeka,

muhuwileni yeye siku zose.

7 Mchuuzi kosang'hanila ningo za uvwizi,

kolonda ng'hani kubamanya wanhu.

8 Isilaili kalonga, "Niye nina vinhu vingi ng'hani,

niye nina chila chinhu,

na sihasanya mbee."

9 "Niye Mndewa Mulungu, Mulungu wako,

nikulavile kuna iisi ya Misili,

nizakutenda ukale muna dihema kaidi,

fana viutenda muna yamadugila ya vibanda.

10 Nilonga na walotezi,

nyongeza malaguso mengi,

nisang'hanila masimwe kufosela walotezi."

11 Vino uko Gileadi kuna wihi?

Wanhu wake hawafaya chinhu.

Vino hawalava nhambiko za kutimbula uko Giligali?

Chila mbahasha yawo ilinga fana mbahasha za mabwe muna umgunda ulimigwe.

12 Yakobo kakimbilila muna iisi ya Shamu,

kasang'hanila muladi yapate muke,

kadima ng'hondolo muladi yapate muke.

13 Mndewa Mulungu kamsang'hanila mulotezi kuwalava Waisilaili Misili,

kwa walotezi kaweka goya.

14 Wanhu wa Isilaili wamguma ludoko ng'hani Mndewa Mulungu,

Mndewa Mulungu kezawalihiliza yehile yawo yose,

kezawatagusa kwa mbuli zihile ziwatendile.