1 Wanhu wolonga, "Izoni chimbwelele Mndewa Mulungu,

kwaviya yeye kachivavatula chipate vilonda,

mbali kezachihonya,

yeye kachilumiza na iviya yeye kezaching'ha dawa ya vilonda vetu.

2 Zihafosa siku mbili kezachihonya,

siku yeketatu kezachinula,

muladi chidahe kukala kuulongozi wake.

3 Chivimanye na chigendelele kummanya Mndewa Mulungu.

Kulawilila kwake kwa kweli fana viya zuwa vidisomoza imitondo.

Nayo kezachizila fana mvula za masika,

fana mvula za vuli vozitonya mwiisi."

4 Mbali Mndewa Mulungu kolonga,

"Weye Isilaili, nikutendele choni?

Weye Yuda, nikutendele choni?

Ulondo wako wa kufunya umoyo ulinga fana kungugu da imitondo,

ulinga fana nhungwe yoisegela himahima.

5 Ivo nimkanhani vihande vihande kwa milomo ya walotezi,

nimkomani kwa mulomo wangu,

nhaguso zangu zokwaka fana lumwemwe.

6 Kwaviya nolonda ulondo wa kufunya umoyo siyo nhambiko,

na kummanya Mulungu kufosa nhambiko za kutimbula.

7 Wabena Lagano fana Adamu,

uko hawakalile waminika kumwangu.

8 Gileadi ni bululu da wanhu wotenda mbuli zihile,

bululu dihakigwa manha kwa ichimu cha ukomaji.

9 Fana viya wahokaji viwomsepa munhu,

ivo niivo wakulu wa nhambiko viwaiting'hane hamwe,

wawakoma wanhu muna inzila yoihita Shekemu,

wotenda mbuli zihile ng'hani.

10 Muna ikaye ya Isilaili niwona mbuli ihile,

uko watenda ugoni,

Waisilaili wotendigwa wambule mwiko.

11 Iviya weye Yuda, kwandikiligwa mavuno.

Baho vondaniwabweleze wafungwa wa wanhu wangu."