1 Waisilaili wakala fana mzabibu unogile, mzabibu ukwima matunda.

Matunda viyaiyohile kongezeka,

ivo viwaiyohile kuizengela chila lupango lwa mulungu Baali,

viya isi yawo viiyohile kunogeza,

ivo viwaiyohile kuhamba mhanda za nhambiko.

2 Mizoyo yawo imema uvwizi,

lelo wezatagusigwa kwa ubananzi wawo,

Mndewa Mulungu kezabomola chila lupango lwawo,

na kezazinanga mhanda zawo za nhambiko.

3 Maabaho wezalonga,

chabule kaidi mfalume,

kwaviya hachimdumbile Mndewa Mulungu.

Mbali hata one chihawile na mfalume yahachitendele choni?

4 Wolonga mbuli za chakachaka,

viwoilagana woilaha uvwizi,

wanhu woilongeleza kuna ichitala,

walinga fana savu dili na sumu kumgunda.

5 Wakaya wa Samalia wezagudemeka,

kwa ichimu cha nyang'hiti ya dang'ang'a da kuja Besi Aveni.

Wanhu wake wodililila dang'ang'a diya,

mbaka wakulu wa nhambiko woditambikila wodililila,

kwaviya ukulu wa dang'ang'a diya usegezigwa.

6 Nyang'hiti iyo izagaligwa Ashulu,

fana chitumetume kwa mfalume mkulu,

wanhu wa Isilaili wezagumigwa chinyala,

wezaiwonela chinyala nyang'hiti yawo.

7 Mfalume wa Samalia kezakwaga,

fana hovu muna yamazi.

8 Chila lupango lwa uhasanyi uko Aveni lwizabomoligwa,

hanhu haja Waisilaili howatendile uhasanyi.

Miwa na mbigili vizakota,

na kugubika chila lupango lwawo.

Maabaho wezailongela milima, "Chigubikeni!"

na vilima "Chilagalileni!"

9 Mweye Waisilaili, mutenda uhasanyi kwandusila uko Gibea,

na musigala uko.

Kweli ng'hondo izamnangani mweye mutenda mbuli zihile uko Gibea.

10 Lusita lonilonda, nizamtagusani,

wanhu wa zisi zimwenga wezaiting'hana kumkomani,

na wezamtendani mweye Waisilaili muwe watumwa wawo,

kwa ichimu cha mbuli mbili zimuhasanye.

11 Isilaili kalinga fana dang'ang'a difundizigwe vinogile, kalonda kubeta ngano.

Mbali singo yake inogile nizaifunga kongwa,

Yuda kezalima kwa gembe yeye mwenyewo.

Yakobo kezabulula gembe da kuhalilila.

12 Ihandileni unovu,

goboleni ulondo wa kufunya umoyo,

limeni migunda ilekigwe,

kwaviya lusita lwa kumzahila Mndewa Mulungu lufika,

muladi yamgalileni unovu fana mvula.

13 Mbali mweye muhanda wihi,

na mugobola ubamanyi,

muja matunda ya uvwizi wenu,

kwaviya muhuwila nguvu zenu wenyewo,

na wingi wa watowang'hondo wako.

14 Ivo wanhu wako wezapata tibwilitibwili da ng'hondo,

mhongono zako zizabomoligwa,

fana viya mfalume Shalimani viyawanangile wanhu wa Besi Alibeli kuna ing'hondo,

na china mama viwabeneke hamwe na wanawo.

15 Mweye wanhu wa Beseli, mbuli ino izamulawililani,

kwaviya muna wihi mkulu,

kwahakunguzuka mfalume wa Isilaili kezakomigwa.