1 "Isilaili viyakalile mwana, nimulonda.

Kulawa Misili nimtanga mwanangu.

2 Mbali vinigendelele kuwatanga,

ivo waiyohile kuhita kutali,

wagendelela kuwatambikila Mabaali,

na wazisomela ubani nyang'hiti za milungu yawo.

3 Niwafunza wanhu wa Isilaili kugenda,

niwasola muna yamakono yangu,

mbali hawavimanyile kuwa niye iyo niwalolese.

4 Niwalanguliza kwa uhole,

niilumba nawo kwa ulondo,

fana tata viyomwinula mwana mbaka kuna yamakanza yake,

niivo viniwatendele wawo, niidulika na niwang'wiza.

5 "Lelo wezabwela muna iisi ya Misili na wezagwiligwa na mfalume wa Ashulu, kwaviya hawasamile kumwangu.

6 Panga dizakwiza muna yamabululu yawo,

dizabena mhalaligwe za nyivi za mabululu yawo,

na kuyananga malungilo yawo.

7 Wanhu wangu wailunga kunileka,

womtanga mulungu Baali yawataze,

mbali hadaha kuwenula.

8 Weye Isilaili, nodahaze kukuleka?

Weye Isilaili, nodahaze kukwasa?

Nizadahaze kukutenda fana bululu da Adima?

Nizadahaze kukutenda fana bululu da Seboimu?

Moyo wangu uhinduka,

noiyoha kuwona ubazi.

9 Nizalukimilila ludoko lwangu lukulu,

sizawananga kaidi Waisilaili,

kwaviya niye Mulungu siyo munhu,

niye niiyo Yelile vimwili na sizakwiza kwa ludoko.

10 Wezanisondelela niye Mndewa Mulungu yonitongoloma fana simba,

vondanitongolome wezanizila kulawa uhelelo wa zuwa kuno wogudemeka.

11 Wezakwiza kulawa Misili kuno wogudemeka fana ndege,

wezazumha kulawa Ashulu fana huwa,

niye nizawabweleza kumwawo." Mbuli ino ilawa kwa Mndewa Mulungu.

12 Wanhu wa Isilaili wogendelela kunivwizila,

na wanhu wa Yuda wovwiza,

mbali wanhu wa isi ya Yuda wang'hali waminika na womtambikila Mulungu Yelile.