1 "Vondanimuhonye Isilaili,

baho uhasanyi wa Isilaili wizagubuligwa,

na wihi wa Samalia nizaugubula.

Kwaviya wotenda uvwizi na wabavi wotula zikaye,

na bumbila da wahokaji wobawa muna zinzila.

2 Hawagesa kuwa nokumbuka sang'hano zawo zose zihile.

Uhasanyi wawo uwazunguluka banzi zose,

mbuli zihile zose ziwatendile za kuulongozi wangu.

3 "Womtenda mfalume yadeng'helele kwa mbuli zawo zihile,

iviya wawatenda walangulizi wawo wadeng'helele kwa uvwizi wawo.

4 Wose wagoni.

Wawo walinga fana tanuli disomigwe,

diya msomaji hadikong'hele kwandusila viyobuluga usage mbaka vondaututumuke.

5 Siku ya dugila da mfalume wetu,

walangulizi waugula kwa upele,

nayo mfalume kailumba na wanhu wa kwiinzikila.

6 Mizoyo yawo iwa fana tanuli,

lusita viwokotela, ludoko lwawo lofuka yosi,

imitondo lokwaka fana moto woulava milambi.

7 Wose wapata moto fana tanuli,

wowasoma watawala wawo,

wafalume wawo wose wagwa,

na habule yonipula nimtaze."

8 Isilaili koihanganya na wanhu wa zisi zimwenga.

Isilaili kowoneka fana gate hadihinduligwe.

9 Manyambenyambe wamkomeleza nguvu zake,

mbali yeye mwenyewo havimanyile,

uhenga umema muna iditwi jake,

mbali yeye mwenyewo havimanyile.

10 Magoda ya Waisilaili yowalagusa wawo wenyewo, hawasama kumwangu niye Mndewa Mulungu, Mulungu wawo,

iviya hawanizahila kwa mbuli izo zose.

11 Isilaili kawa fana nziwa mbozi yelibule nzewele, lusita kauko Misili kopula kutazigwa na lusita kauko Ashulu kopula kukalizigwa.

12 Vondawahite nizakwanzanza lwavu lwangu niwanamate,

nizawagwisa hasi fana ndege wa kuulanga,

nizawatagusa kwa mbuli zawo zowatendile.

13 Wezagaya kwaviya wanikimbila,

wezanangigwa kwaviya wanilema!

Nolonda kuwakombola, ingawa walonga uvwizi kusonhela niye.

14 Hawanililila kulawa muna imizoyo yawo,

mbali wolongelela muna yamakomwa yawo.

Woikanhakanha kuno womtambikila Baali muladi wapate ndiya na divai,

mbali wanileka niye.

15 Niwafunza na niyagangamiza makono yawo,

mbali wanitendela mbuli zihile.

16 Woihindukila milungu yawo ya uvwizi

wawo walinga fana upinde haufaya,

watawala wawo wezanangigwa kwa uzele,

kwa ichimu cha ulonzi wawo wa mdukula,

ivo wezazehigwa muna iisi ya Misili.