1 Mweye Waisilaili, sekemusekelele,

sekemutende madugila fana zisi zimwenga,

muwa wazinzi kwaviya muleka kumtegeleza Mulungu wenu,

mudeng'helela yombe da ugoni kwa chila hanhu ha kubigila ndiya.

2 Mbali ngano na nongo za divai havizamulisani, hamwizapata divai ya sambi.

3 Hamwizakala muna iisi ya Mndewa Mulungu, mbali mweye Waisilaili mwizabwela Misili,

na mwizakuja ndiya yambule mwiko uko Ashulu.

4 Hamwizamgidila Mndewa Mulungu nhosa ya divai,

na nhambiko zenu hazizamnogeza Mndewa Mulungu.

Nhambiko fana izo zizakuwa fana ndiya ya matanga,

wanhu wose woja ndiya iyo wokwambula mwiko,

izakuwa ndiya ya kwigutiza muhala,

haizakwingila muna ikaye ya Mndewa Mulungu.

5 Vino mwizatenda choni muna didugila dipangigwe,

na muna didugila da Mndewa Mulungu? Hamwizadaha.

6 Vondamukimbile ng'hondo muna iisi yenu.

Misili izamkunzagizani,

na mwizawandigwa muna dibululu da Memfisi,

ngama zenu za hela zizaminyigwa na miwa,

miwa izamema muna yamahema yenu.

7 Siku za kutagusigwa zifika,

siku za kulihiliza chisasi zahabehi,

Waisilaili molondeka mulumanye lusita ulwo,

mweye molonga, "Mulotezi mbozi kolangulizigwa na muhe wa umbunye."

Mweye molonga ivo kwa ichimu cha uhasanyi wenu mkulu,

kwa ichimu cha ludoko lwenu lukulu ng'hani.

8 Mulotezi kakala mkalizi wa Isilaili hamwe na Mulungu wangu,

mbali mitego yomgozela,

na kutibusa kwamuna Ikaye ya Mulungu wake.

9 Mwingila muna uwihi,

fana muna zisiku za Gibea.

Mulungu kezakumbuka mbuli zenu zihile,

na kezamtagusani kwa uhasanyi wenu.

10 Mndewa Mulungu kolonga,

"Viniwafikile Waisilaili, wakala fana zabibu muna dibwilingu,

viniwawonile wasaho zenu,

wakala wanhu goya fana nhini za mwanduso,

mbali viwafikile kuja Baali Peoli,

wasagula kumtambikila Baali,

watibusa fana chinhu chiya chowachilondile.

11 Ukulu wa Isilaili wizasegela fana ndege,

wana hawezakwelekigwa kaidi,

hakwizakuwa na wana wa kwelekwa,

na hakwizakuwa na wimo.

12 One waheleka wana,

nizawahoka wana wawo,

hezasigala hata imwe, kwaviya wezagaya vondanisegele na kuwaleka.

13 Nimuwona Isilaili kalinga fana mtende mdodo kuna iisi inogile.

Mbali sambi Isilaili kezawalongoza wanage wakachinjigwe."

14 Weye Mndewa Mulungu, vino wanhu wano kwizaweng'ha choni?

Vino kwizawatagusaze?

Uwatende wake zawo sekeweleke,

uwatende wapuwe matombo ya kong'heza wana wawo.

15 Kwaviya mbuli zawo zihile zowatendile zandusila Giligali,

uko niuko nyanduse kuwehila.

Kwa ichimu cha sang'hano zawo zihile,

nizawawinga muna ikaye yangu na sizawalonda kaidi,

walangulizi wawo wose wanileka.

16 Wanhu wa Isilaili watowigwa,

wawa fana mbiki unyalile,

haweleke wana.

One waheleka wana,

nizawakoma wana wawo wowalonda.

17 Mulungu wangu kezawalema,

kwaviya walema kumtegeleza.

Ivo wezawegela muna izisi zimwenga.