1 Maabaho watangeni sekulu zenu, "Wanhu wangu," na lumbu zenu, "Wanhu wowoneligwa ubazi."

2 Mbwakileni mami yenu, mbwakileni,

kwaviya yeye siyo muke wangu,

na niye siyo mulumake,

mulongeni yasegele na ugoni wake,

iviya sekeyabwelele kutenda ugoni.

3 One hatendile ivo,

nizamuhambula mawalo yake,

nizamuleka ukengele fana viyavumbuke,

na nizamtenda yawe fana bwilingu,

na nizambweleza kuna iisi inyalile,

na nizamkoma na ng'hilu.

4 Sizawawonela ubazi wanage,

kwaviya wana wa ugoni.

5 Mami yawo katenda ugoni,

yasolile inda katenda mbuli za chinyala,

Gomeli kalonga, "Nizailumba na walume zangu,

waja woning'ha ndiya na mazi,

sufu na chitani na mavuta na divai."

6 Kwa ichimu icho nizakwika miwa fana ng'huta muna inzila yake,

nizamzengela mhongono muladi sekeyadahe kusulupuka.

7 Gomeli kezawasondelela walume zake mbali hezawapata,

kezawazahila mbali hezawawona.

Maabaho kezalonga, "Nizambwelela mulumangu wa ichanduso,

kwaviya nikala goya kufosa sambi."

8 Gomeli havimanyile kuwa niye nimwing'ha ndiya na divai na mavuta,

na nimwing'ha hela na zahabu,

voyavisang'hanile kwa mulungu Baali.

9 Ivo lusita lwa kugobola nizaisola ngano yangu na divai yangu,

nizamuhoka mawalo yangu ya sufu na mawalo yangu ya chitani yonimwing'hile yaigubike.

10 Nizamguma chinyala haulongozi ha wanhu woyatendile nawo ugoni,

na habule munhu yodaha kunikimilila.

11 Nizayatenda madugila yake ya dini sekeyagendelele,

madugila yoyotenda chila mwaka na chila mwezi ukwima,

na muna zisiku za mhumulo.

12 Nizainanga mizabibu yake na minhini yake,

iyalongile kuwa niiyo sang'hano yake iyeng'higwe na wanhu womulonda yakala maliho yake,

nizaitenda mizabibu yake na minhini yake kuwa mbago,

na wanyama wa kumbago wezaija.

13 Nizamtagusa kwa siku zoyawatambikile Mabaali na kuwasomela ubani,

kaihamba kwa mhete zake za hela nyingi,

na kawahitila walume zake,

kanizimiza niye Mndewa Mulungu.

14 Lelo nizamsongeza,

nizamulongoza mbaka kudibwilingu,

na kulonga nayo kwa uhole.

15 Uko nizambwelezela migunda yake ya mizabibu,

niye nizaditenda bawe da Magayo kuwa lwivi lwa uhuwilo,

uko kezakwimba fana viyatendile viyakalile mhambe,

fana muna isiku iyalawile Misili.

16 Mndewa Mulungu kolonga, "Siku iyo kwizanitanga, ‘Mulumangu’, hwizanitanga kaidi ‘Mwenevale wangu.’ "

17 Nizayasegeza mazina ya Mabaali muna umulomo wake,

na hawezatambuligwa mazina yawo kaidi.

18 Siku iyo nizatenda lagano na wanyama wose wa kumbago na ndege wa kuulanga

na wang'onyo wotambala hasi,

muladi sekewawanange wanhu wangu.

Nizasegeza mhinde zawo na mazele yawo na ng'hondo muna iisi yawo,

nizawatenda wagone vinogile.

19 Nizakusola uwe muke wangu siku zose,

nizakufungila zengele voilondeka,

kwa haki na kwa unovu na kwa ubazi na kwa ulondo wa kufunyaumoyo.

20 Nizakufungila zengele kwa uwaminika na kwizanimanya niye Mndewa Mulungu.

21 Mndewa Mulungu kolonga,

"Siku iyo nizakwidika,

nizakwidika kwa ulanga na isi.

22 Isi izakwidika kwa ndiya,

divai ya sambi na mavuta,

vizakwidika kwa Yezileeli*, yani Mulungu kohanda.

23 Nizamuhanda muna iisi kwa ichimu changu mwenyewo,

na nizamuwonela ubazi ija Lo Luhama.

Nizamulongela ija Lo Ami, ‘Weye munhu wangu,’

nayo kezalonga, ‘Weye Mulungu wangu.’ "