1 Toweni mhalati kuna umulima Sayuni,

guteni nyangi kuna umulima wangu welile,

Gudemekeni mweye wanhu wa Yuda,

kwaviya siku ya Mndewa Mulungu ya kutagusa yokwiza,

siku iyo yahabehi!

2 Siku iyo ya ziza didumbiza,

siku iyo ya mawingu na ziza totolo.

Bumbila kulu dokwiza,

fana zuwa vodilawa uchanyha ya milima.

Mbuli iyo hailawilile umwaka na haizalawilila kwa nyelesi zose zikwiza.

3 Fana moto viutimbula,

bumbila ijo dobananga chila chinhu chili kuulongozi na kuchisogo,

na habule chinhu chondachisigale.

Kuulongozi kowofosa kulinga fana chizi cha Edeni,

mbali wahakomeleza kufosa kosigala bwilingu muhala.

4 Nzige wawo walinga fana falasi,

wokimbila fana watowang'hondo wakwelafalasi.

5 Viwozumha kuna zinhembeti za milima,

wobuma fana viya matololi ya kubululigwa na falasi,

wobuma fana moto wa mayani yanyalile.

Wobuma fana magalu waisasale kwa ng'hondo.

6 Wanhu viwowawona wawo viwokwiza,

vihanga vawo voyauka kwa kudumba.

7 Wokimbila fana magalu wa ng'hondo,

wokwela uchanyha ya ng'huta fana watowang'hondo.

Wose wohita kuulongozi dimwe kwa dimwe,

habule hata imwe yobaguka.

8 Habule yomsung'ha miyage,

wose wosondelela inzila.

Wofosa hata one wahatowigwa na silaha,

habule chinhu cha kuwakimilila.

9 Woditowa bululu,

wozumha uchanyha ya ng'huta,

wokwela na kwingila muna yamazonzo fana wabavi.

10 Isi yowagudemekela,

ulanga wotingisika,

zuwa na mwezi vogumigwa ziza,

nhondo nazo hazibung'hula.

11 Mndewa Mulungu kodilanguliza bumbila jake kwa dizi kulu,

kwaviya watowang'hondo wake wengi ng'hani,

womtegeleza hawapeteka.

Siku ya Mndewa Mulungu ya kutagusa ng'hulu na yodumbiza ng'hani!

Yelihi yodaha kuifunyila umoyo?

12 Mbali Mndewa Mulungu kolonga, "Hata sambi modaha kunibwelela kwa mizoyo yenu yose,

kwa kufunga na kulila."

13 Sekemudege mawalo yenu kwa kulagusa usungu,

mbali mizoyo yenu yolondeka iwe ya unyendanyenda.

Mbweleleni Mndewa Mulungu, Mulungu wenu.

Yeye kana ubazi na ulondo wa kufunya umoyo,

hapata ludoko himahima,

kanoga ng'hani koisasala kugalula magesa yake muladi sekeyataguse.

14 Yodahika Mndewa Mulungu, Mulungu wako kezagalula magesa yake.

Iviya kezamtemelani mate kwa kumwing'hani ndiya,

muladi mudahe kumulavila nhosa za ving'waji na mhule.

15 Toweni mhalati uko Sayuni!

Waduganyeni wanhu hamwe,

uwalongele wafunge kuja.

16 Muwaduganye wanhu wose,

muusafye mting'hano wose,

waduganyeni walala na wana na ving'hele.

Msola na msoligwa walawe muna iviheleto vawo.

17 Walongele wakulu wa nhambiko womsang'hanila Mndewa Mulungu walile hagati ya lupango na hanhu ha kwingilila muna Ikaye ya Mulungu.

Walonge, "Weye Mndewa Mulungu, uwawonele ubazi wanhu wako.

Sekeuwaleke wanhu wa zisi zimwenga wawehule na wawaseke kwa kulonga, ‘Mulungu wawo kakulihi?’ "

18 Maabaho Mndewa Mulungu kawona wivu kwa ichimu cha isi yake,

ivo kawawonela ubazi wanhu wake.

19 Mndewa Mulungu kawedika wanhu wake kawalongela,

"Nizamgalilani ndiya na divai na mavuta,

mwizakwiguta vinhu ivo,

na sizamgumani chinyala kwa wanhu wa zisi zimwenga.

20 Nizawawinga wehi wolawa ubanzi wa kasikazi,

nizawabalasa mbaka kuna dibwilingu,

watowang'hondo weli kuulongozi nizawasa muna ibahali ya Munyu,

na weli kuchisogo nizawasa muna ibahali ya Meditelaniya.

Mitufi yawo izalava vundo na izanung'ha ng'hani."

Kwaviya Mndewa Mulungu katenda mbuli ng'hulu.

21 Mndewa Mulungu katenda mbuli ng'hulu,

ivo walongeleni wanhu wa isi wadeng'helele na sekewadumbe.

22 Sekemudumbe, mweye wanyama wa kumbago,

kwaviya mgina wa kudibwilingu wolava miche,

mibiki yokwima matunda,

minhini na mizabibu yokwima ng'hani.

23 Mweye wanhu wa Sayuni, deng'heleleni,

msangalileni Mndewa Mulungu, Mulungu wenu,

kwaviya yeye komgalileni mvula yoilondeka,

kagala mvula,

mvula ya masika na mvula ya vuli fana viya umwaka.

24 Hanhu ha kubetela hezamema ngano,

hanhu ha kukamila hezamema divai na mavuta.

25 Nizambwelezelani chila chinhu chidigwe na nzige na ngeda na mbalangulu,

bumbila kulu donimgalileni.

26 Mwizapata ndiya nyingi ya kwiguta,

mwizaditogoza zina jangu niye Mndewa Mulungu, Mulungu wenu,

yonimtendeleni mbuli za mwazanyo,

wanhu wangu hawezakwehuligwa kaidi.

27 Mweye Waisilaili mwizavimanya kuwa niye nahagati yenu,

iviya niye Mndewa Mulungu niiyo Mulungu wenu, habule imwenga.

Wanhu wangu hawezagumigwa chinyala kaidi.

28 Maabaho nizawagalila wanhu wose muhe wangu,

wanenu wa chilume na wanenu wa chike wezalotela na walala wezalota nzozi,

wabwanga wenu wezawona malaguso.

29 Iviya nizaweng'ha muhe wangu wasang'hani wenu wa chilume na wa chike.

30 Nizatenda mbuli za mwazanyo muna iisi na kuulanga,

kwizalawilila damu na moto na yosi dikwela uchanyha.

31 Zuwa dizagalusigwa kuwa ziza,

mwezi wizakuwa mdung'hu fana damu.

Mbuli izo zizalawilila ing'hali hainafika siku iyo ng'hulu ya Mndewa Mulungu ya kutagusa yoidumbiza,

32 Mndewa Mulungu kezamkombola munhu yoyose yompula yamtaze,

kwaviya kuna umulima Sayuni na uko Yelusalemu kwizakuwa na wanhu wondawakomboligwe,

fana Mndewa Mulungu viyalongile.

Mndewa Mulungu kawasagula waja wokomboligwa.