1 Mbuli zino niizo zoyanilaguse Mndewa Mulungu. Nimuwona Mulungu kolumba nzige, lusita wanhu viwakomeleze kuwakanhila mgina wanyama wa mfalume. Lusita ulo mgina ukala wosuka kaidi. 2 Niwona nzige wawo woja na kukomeleza mayani yose muna iisi. Maabaho nilonga,

"Weye Mndewa Mulungu, nokulamba uchilekelele!

Vino Welesi wa Yakobo wodahaze kuwa wagima?

Wawo wanyondenyonde ng'hani!"

3 Ivo Mndewa Mulungu kagalula lungilo jake,

kalonga, "Mbuli iyo haizalawilila."

4 Mndewa Mulungu kanilagusa chilaguso chimwenga. Nimuwona Mndewa Mulungu koutanga moto wize kuwatagusa wanhu. Moto uwo unyaza vilindi va bahali, wandusa kutimbula isi inyalile. 5 Maabaho nilonga,

"Weye Mndewa Mulungu, nokulamba uleke kutagusa,

Vino welesi wa Yakobo wodahaze kuwa wagima?

Wawo wanyondenyonde ng'hani!"

6 Ivo Mndewa Mulungu kagalula lungilo jake,

kalonga, "Mbuli iyo haizalawilila."

7 Mndewa Mulungu kanilagusa chilaguso chimwenga. Niwona Mndewa Mulungu kakala yemile habehi na ng'huta, kamha luzabi lwake luli na timazi.

8 Nayo kaniuza, "Amosi kowona choni?" Nimwidika, "Nowona timazi." Maabaho Mndewa Mulungu kalonga,

"Nokwika timazi ino kwa wanhu wangu Waisilaili.

Sizagalula lungilo jangu da kuwatagusa.

9 Kuja kuna ivilima kowotambika welesi wa Isaka,

kwizanangigwa ng'hani,

na chila hanhu ha kutambikila ha Waisilaili hezakuwa matongo.

Nizawananga welesi wa mfalume Yeloboamu kwa zele."

10 Maabaho Amazia mkulu wa nhambiko wa Beseli katuma usenga kwa mfalume Yeloboamu wa Isilaili, kalonga,

"Amosi kogala udelenya kumwako weye mfalume wa Isilaili.

Wanhu hawadaha kufunyila umoyo mbuli zake.

11 Yeye kalonga,

‘Mfalume Yeloboamu kezadanganika kwa zele na Waisilaili wezagaligwa kuuhami,

kutali ng'hani na isi yawo.’ "

12 Maabaho Amazia kamulongela Amosi, "Weye mulotezi, sambi chikulegela, segela. Hita kuna iisi ya Yuda, ukalotele uko na upate ndiya. 13 Sekeulotele kaidi hano Beseli, kwaviya hano hanhu ha kutambikila ha chifalume howotambikila wanhu wa isi yose."

14 Amosi kamwidika Amazia, "Niye siyo mulotezi wa kulihigwa na siyo imwe wa chibumbila cha walotezi. Niye mdimi na ndolezi wa mikuyu. 15 Mbali Mndewa Mulungu kanilava muna isang'hano yangu ya kudima ng'hondolo na kanilongela, ‘Hita ukawalotele wanhu wangu Waisilaili.’ 16 Lelo weye Amazia, tegeleza mbuli ya Mndewa Mulungu. Weye konilongela sekenilotele kusonhela Waisilaili na sekenilonge mbuli yoyose kusonhela welesi wa Isaka.

17 Kwaviya Mndewa Mulungu kolonga,

‘Muke wako kezakuwa malaya muna dibululu,

wanago wa chilume na wanago wa chike wezakomigwa kuna ing'hondo.

Isi yako wezagoleligwa wanhu wamwenga,

weye mwenyewo kwizadanganikila muna iisi ya chigeni,

kweli Waisilaili wezagaligwa kuuhami,

kutali ng'hani na isi yawo.’ "