1 Tegelezeni mbuli ino, mweye wanaake wose mnenehe fana viya ng'ombe wa Bashani,

wowokala uchanyha ya mulima wa Samalia.

Mweye mowawonela ngayengaye na wanhu welibule watazi,

na kuwalongela walume zenu, "Muchigalile divai ching'we."

2 Niye Mndewa Mulungu nyelile niilaha,

"Siku zokwiza wanhu vondawambululeni na ndwano ng'hulu,

chila imwe vimwili fana somba muna indwano.

3 Mweye mwizalawa hanhu habomoligwe,

chila muke dimwe kwa dimwe.

Na mweye mwizakwasigwa uko Halimoni."

Mndewa Mulungu kolonga ivo.

4 "Mweye Waisilaili,

hiteni Beseli mkatende uhasanyi.

Hiteni Giligali mkongeze uhasanyi wenu!

Laveni nhambiko zenu chila imitondo,

na zaka zenu chila siku yetatu.

5 Mulave nhosa ya hewela ya magate yagumigwe lusu,

mugong'onde chila hanhu kuwa mulava nhambiko ya kulonda wenyewo,

kwaviya mweye Waisilaili mulonda kutenda ivo."

Mndewa Mulungu kolonga ivo.

6 "Nigala nzala muna yamabululu na vibululu,

mbali hamunibwelele."

Mndewa Mulungu kolonga ivo.

7 "Viikalile ing'hali miyezi mitatu kufika lusita lwa kugobola,

simgalileni mvula,

mbali nigala mvula muna dibululu dimwenga na bululu dimwenga sidigalile.

Mgunda umwe upata mvula na umwenga upuwa mbaka unyala.

8 Wanhu wa mabululu maidi hebu matatu, waibululila kuna dibululu dimwenga,

muladi wapate mazi mbali hayafaiye.

Mbali hamunibwelele."

Mndewa Mulungu kolonga ivo.

9 "Nimgalilani hulo da ng'hangu na chimvuguya.

Ninyaza vizi venu na migunda yenu ya mizabibu.

Nzige waja minhini yenu na mizaituni yenu.

Mbali hamunibwelele."

Mndewa Mulungu kolonga ivo.

10 "Nimgalilani hulo kulu,

fana doniwagalile Misili.

Niwakoma wabwanga wenu kwiing'hondo.

Nisola falasi wenu wa ng'hondo.

Mitufi imema muna yamalago yenu

na vundo jake dimema muna zimhula zenu.

Mbali hamunibwelele."

Mndewa Mulungu kolonga ivo.

11 "Niwananga wamwenga wenu,

fana vininangile Sodoma na Gomola.

Wahonyokwe wakala fana chibiki chisegezigwe muna umoto,

mbali hamunibwelele."

Mndewa Mulungu kolonga ivo.

12 "Ivo mweye Waisilaili, nizamtagusani.

Kwaviya nizatenda ivo,

muisasale kuiting'hana na niye kutagusigwa,

niye Mndewa Mulungu, Mulungu wenu."

13 Mulungu niiyo yekile milima,

iviya keka beho kulu,

niiyo yomulongela munhu chiya choyogesa,

niiyo yogalula imisi kuwa ichilo,

na kubojoga milima.

Mndewa Mulungu Yeli na Udahi niijo zina jake.