1 Mweye wanhu wa Yelusalemu, iduganyeni kuisasala kwa ng'hondo,

kwaviya bululu jetu dizingigwa.

Wehi wetu wachizinga na wachiminya.

Wezamtowa mtawala wa Isilaili na fimbo muna dikanza jake.

2 Mbali weye bululu da Beselehemu dili Efulata,

ingawa kwa mdodo muna zing'holo za Yuda,

kumwako kezalawilila mtawala yondayatawale isi ya Isilaili,

yeye kandusa umwaka ng'hani.

3 Mulungu kezawaleka wanhu wa Isilaili wahumigwe na wehi wawo,

mbaka muke yeli na usungu vondayaibasule.

Maabaho wanhu wa mtawala iyo wasigale,

wezabwela kuilumba na wanhu wa Isilaili.

4 Kezakwima na kudidima bumbila jake,

kwa udahi wa Mndewa Mulungu,

na kwa nguvu za zina jake.

Nawo wezakala goya,

kwaviya kezahishimigwa muna izisi zose.

5 Iviya kezagala tindiwalo.

Lusita Waashuli vondawaitowe iisi yetu,

na kufosa muna zimhongono zetu,

chizatuma wakulu wa watowang'hondo wetu wengi wakawatowe.

6 Wezaihuma isi ya Ashulu kwa zele,

wezaihuma isi ya Nimulodi kwa mgoha,

kezachilopola mwa Waashulu vondawaitowe iisi yetu.

7 Welesi wa Yakobo wondawasigale wagima muna izisi nyingi,

wezakuwa fana viya nhungwe kulawa kwa Mndewa Mulungu,

fana mawaga ya mvula muna yamayani,

yayo hayagaligwa na munhu,

na hayamuhuwila munhu.

8 Welesi wa Yakobo wasigale wagima,

wezapwililika muna izisi zimwenga,

wezakuwa na nguvu ng'hani,

fana viya simba muna iwanyama wa kumbago,

fana viya mwanasimba muna yamabumbila ya ng'hondolo,

yolumiza ng'hani na kuvavatula chila viyofosa hagati yawo,

iviya habule yodaha kuwakombola.

9 Waisilaili wezawahuma wehi wawo,

na kuwananga ng'hani.

10 Mndewa Mulungu kolonga,

"Lusita ulwo nizawananga falasi wenu

na nizayabananga matololi yenu ya kubululigwa na falasi.

11 Nizayananga mabululu yeli muna iisi yenu,

nizabomola mhongono zenu.

12 Nizaubananga uhawi wenu,

na hamwizatowa bao kaidi.

13 Nizazinanga nyang'hiti zenu,

na mabwe yenu ya nhambiko,

ivo mwizaleka kutambikila vinhu vimuvitendile wenyewo.

14 Nizazinanga mhanda zenu za mulungu Ashela

na nizayabomola mabululu yenu.

15 Kwa ludoko lwangu,

nizalihiliza chisasi kwa wanhu wa zisi zilema kunitegeleza."